الزين الماحي
(قصيدة بعنوان عوضية)
ساقوها نص الليل
لا جوطة لاكوراك
والحلة جت ساكته
كان جوها عربيتين
جدعوها في البوكسي
والليلة جد ساقطة
لمت هدمها عليها
مخلوعة جد كانت
مستغربه الجاتا
قعدت تجوط تسأل
مالكم معاي ياناس
شاتوها بالباته
دمعاتها كبن شو...
هاكم دي سته جنيه
كان إنتو همباته؟
سألوها شن إسمك
رفعت رويسا تمام
وبي نبرة جد ساخطة
أنا إسمي عوضية
لكن نسيتو زمان
مشهورة بي بطة
وبتقري وين يابنت
ضحكت وقالت هوي
طلعت من ساته
طيب أبوك وأمك؟
يطرشني يعميني
لاسمعت لاشفتا
ورينا عمري كم؟
سنين كتار راحو
بس ماني حسبتا
المهنة والشغلة؟
ست شاي وست دكان
فاتحاهو للفته
سمعنا إنك فوق
طلباتك بالدولار
والجية بالواسطة
ضحكت كمان تاني
ياباشا شن بتقول
أنا لاقية أتغتى ؟
قالوا بتبيعي خمور
ده كان زمان الله
لكني جد تبتا
ساقوها جلدوها
ضحكت وقالت هوي
زولكم البجلد ده
أكبر زبون عندي
وحابسني من سته