منتديات زنكلوني الأدبية ...شعر ..قصص قصيرة...روايات
 
الرئيسيةالرئيسية  البوابةالبوابة  اليوميةاليومية  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  

شاطر | 
 

 مكتبة الشاعر محجوب شريف

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin
avatar

المساهمات : 35
تاريخ التسجيل : 12/11/2011
العمر : 27

مُساهمةموضوع: مكتبة الشاعر محجوب شريف   السبت ديسمبر 10, 2011 7:06 am

مكتبة الشاعر محجوب شريف


مليون سلام يا شعبنا

ومليون حباب
الإغتراب يا ابونا..
ما طول الغياب
الاغتراب
فال البخونك ويزدريك
ونحن بين سُونكيهو..
والزنزانه
والسجن السميك
منك قُراب
أحرار...
وحريتنا فى ايمانا بيك
ثوار بنفتح لى الشمس
فى ليلنا باب..
لى يوم جديد
ابداً جذورك فينا تمتدّ..
وتجيك
وبنفتديك وحا نفتديك
ما بنرمى اسمك في التراب
وعيونا تتوجه إليك
انت المعلم والكتاب
حا نغني ليك ونغني ليك
واليزدريك..
يا ويلو من غضبك عليهو..
ومن مشيك
يا ويلو من أجَلُو الوشيك
يوم ينكسر قيد الحديد
السونكى..
والزنزانه
والسجن السميك
وخطى الشهيد
من حولو تهدر والنشيد
وانت الشمس من بين ايديك
تطلع عليك
من كل باب
مليون سلام يا شعبنا
ومليون حباب

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




وتر مشدود - محجوب شريف



سلمت
خايف كنت ما يسلم قلب مفصود
حلمت
قبلك كنت لا بحلم ولا موجود
معاك بحلم كأني على فرس طاير بغني على وتر مشدود
واطير عبر السما المدود
سما الوطن اللي مالو حدود
حمامة جناها لا خايف ولا مفقود

واشر الغيمة خيمة على النجم وارتاح
أصادف أجمل الغابات واصادق غصنك الفواح
واشرب من زوايا القلب جنبك اخر الأشباح
وتفتح كلمة من عينيك لي مجرى الغنى المسدود

واخط اسمك على باب الزمان اكليل
وردة صبية تلمع فوق صديري النيل
وباسمك أغني لي عالم بسيط وجميل

وانادي عليك ملاذا في شتا الأيام
وبردا في الحياة وسلام
وفي شدة هجير وزحام

جزيرة حنينة بين نهرين حنان القاك عليك اتلم
وهودج في صحاري الهم
وعالي النخيل عليك اتلم
وفي السكة اللي ما بتعود معاك
لآخر المشوار نغني على وتر مشدود


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




احبك احبك
أحلى فصول العمر حنانك
حتة لقيتَ مكانك اجمل
أجمل سكة مشيتَ عيونك
أحبك أحبك أنا مجنونك
ساكن فيني هواك وبريدك
جوا القلب النبض يصونك

معاك معاني حياتي تبدا
وافتح باباً ياما انسدَّ
أشوف العالم ربوة جميلة
عليها نسيم الصبح مخدّة
وبيني وبين النهر عشانك
عشرة بتبدا
وبين عينية وخد الوردة
تبقى مودة
أصالح روحي
تبرا جروحي
ابشر باسمك اهلل أغني
أقيف اتحدى

أديتيني مشاعر حية
عوضتيني الزمن الماضي
زمن الجرح الأكبر مني
وقاسي علية
وبيك صادفني ولقى عنواني
رزاز الفرح الخلَّى الجية
أريت صادفني حنانك بدري
لو لاقيتك بدري شوية

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



السنبلاية
لّما عرفتك اخترتك سعيد البال ..
وختّ شبابى متيقن
عليك آمال
لا جيتك قبيله ..
ولا رجيتك مال
ولا مسحور
ويوم ما كنت في عينىّ ..
أجمل من بنات الحور
جيتك عاشق اتعّلم
من الأيام
ومن سأم الليالى البور
ومن أسر الوِلِف كتّال
لقيتك فى طشاشى دليل ..
وفى حرّ الهجيره مقيل
ركزت على ضاكِ عصاى
لقيتك فى حياتى جذور
بنيّه اتلفّحت بالنور
مهجّنه من غنا الأطفال ..
ومن سعف النخيل والنيل
ومن وهج الشمس موّال

وان اخترتينى إنساناً ..
عزيزَ النفس بتمنّى ..
وبسيط الحال
علىَّ حرَّمت زرعاً
ما سقيتو حلال
ومافصّد حصادو قفاى
وبينى وبينك الضحكه ..
ورحيق الشاى
وطعم الخبز والسُتْره ..
ومساء النور
وعمق الإلفه..
بين النهر
والنخله
وغنا الطمبور
وصدق العُشْره بين الأرضِ ..
والإنسان
وبيني وبينك الفكره ..
وجمال الذكرى
والنسيان
وحسن الظن
ومشوار الحيا اليوماتى
ما بين الجبل والسهل ..
ما بين الصعب والسهل
عزّ الليل ..
وفى سكّه مطر بكّاى
فلا هماً تشيلى براكْ
ولا جرحاً أعانى براى
ولانا على بعض نمتن

وتزعلى يوم ..
وازعل
وننفعل مرات
تقبّلى منّى ..
واتوسّد ضُراعى سكات
وفينا حنينه
تتشابك موده ..
تشابك الغابات
ونحن اذا اختلفنا سوا ..
بنطيع الصاح
ولو بتنا القوا بنرتاح
اذا تمن الملح والعيش..
رُضا الشمّات
وتتكى سنبلايه على ضراعى ..
واميل
كأنى غنا الطفوله العذبْ
كأن الدنيا طى القلبِّ والمنديل
كأنّ الدنيا طىِّ القلب والمنديل
سفيو
03-10-2008, 19:44
جميلة ومستحيلة
يا جميله .. ومستحيله
انت دايما زى سحابه
الريح تعجّل بى رحيلها
عيونى فى الدمعات وحيله
اسمحيلا تشوف عيونك..
اسمحيلا
أنا لا الصبر قادر عليّ..
ولا عندى حيله
يامراسى الشوق تعالى
لا اليالى تمر بدونك هى الليالى
من ضواحى الدنيا جيت..
وعليْ رحالى
لمداين فوق عيونك يا محالى
ريّحينى..
أسُتْرى حالى
فرحينى
عيونى فى الدمعات وحيله
أنا لا الصبر قادر عَلَىْ..
ولا عندى حيله
حدّثت عنك نجمة جارة
وزرعت اسمك..
حارة حارة
فى مناديل العذارى
فى مشاوير الحيارى
فى لحى الأشجار كتبتو..
نحتو فى صم الحجارة
وبحت للشمس البتقدل..
فى مدارها
عيونى فى الدمعات وحيله
اسمحيلا تشوف عيونك
اسمحيلا
أنا لا الصبر قادر عَلَىْ
ولا عندى حيلة
وانتِ منك لا بداية..
عرفت لسّه ولا نهاية
مرة أسرح..
ومرة أفرح..
ومرة تغلبنى القراية
ولّمن أكتبلك وداعاً..
قلبى ينزف فى الدواية
يا صبيّة..
الريح ورايا
خلي من حضنك ضرايا
عيونى فى الدمعات وحيله
اسمحيلا تشوف عيونك
اسمحيلا
أنا لا الصبر قادر علىْ..
ولا عندى حيلة


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



ياشعبا تسامي
يا شعبا تسامي
ياهذا الهمام
تفج الدنيا ياما
وتطلع من زحاما
زي بدر التمام

تدي النخله طولها
والغابات طبولها
والايام فصولها
والبذره الغمام

قدرك عالي قدرك
ياسامي المقام
ياملهم رماحك
سناهاالصدام
ام در والطوابي
في صدرك وسام
ملامح كم
تسامح
تغضب لا تلام
همه وعبقريه
ذمه وفنجريه
ضد العنصريه
وتحلم السلام

فداك وفي حواك
يامدد الكلام عفوك
انت ورضاك
وبرنا ليك تام
وبحلم بهواك بي حسن الختام
دينك كم علينا
منك والدينا
واجمل مالدينا
من يوم السمايه
من قبل الفطام

منك كل حته
في الخاطر
صبابه
جنبك نبته نبته
نكبر نحن ياما
نسألك انت
وانت ورينا الاجابه
علمنا الرمايه
والحجا والقرايه
والمشي بي مهابه
في الضحي والظلام

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




وطنا




ومن منا لم يسمع أو يستمتع بها؟




وطنا البإسمك كتبنا ورطنا




أحبك ..







أحبك مكانك صميم الفؤاد

وباسمك أغنى
تغنى السواقى
خيوط الطواقى
سلام التلاقى
ودموع الفراق

واحبك ملاذ
وناسك عزاز

أحبك حقيقه
وأحبك مجاز

وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس

أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى

أحبك بتضحك
واحبك عبوس
صحى بتملا عينى
وتشّرف غناى

بحضرة جلالك
يطيب الجلوس
مهذب أمامك يكون الكلام
لأنك محنك
عميق الدروس
مجيد المهابة
مديد القوام
شبابك تشابك
شديد الزحام
أراهم وراهم غبار الحياه
مداين تعاين
كأمّ العروس
تهلل تكلل جبين الإمام
رزازاً يبلل أغانى الخليل

أصدق كلامك حقيقه وبخاف
أخاف الطريق اللى ما بودى ليك
وأعاف الصديق اللى ما بهم بيك
معاك انتظارى ولو بالكفاف
وعنك بعيداً أبيت الرحيل
وبيك اعتزاز الصباح الجميل
جميع الأغانى اتكالن عليك


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




عشة كلمينا ميري ذكرينا





عَشّه .. كلّمينا

ميرى.. ذكّرينا

كل سنكى أحسن

يبقى ..مسطرينا

*

نحن شعب أسطى

يلا ..جيبو مونا

نبنى ..نبنى نبنى

مسرحاً..ونــــادى

مصنعــاً ..وبوسته

حرب لا لا لا لا

كبرى..استبــاليه

صالــه للثقــافــه

تســرح الغزاله

جنبها ...الزرافه

ركَ قمرى طار

قيره قيره قيره

نطَط الصغار

صفّق الترولى

طمّن ..القطار

حلقت ..وحلقت

حمامة المطار

كلّ طلقه..بينا

نحن تبقى وفر

سمسماً ..وبفره

سكراً وشاى

تترا سايكلين..

جاى وجاى وجاى

مافى حاجه ساى

كلّو عندو دِين

كلّو عندو راى

بور..وبورسودان

بارا.. والجنينه

عبرى ..ولاّ واو

حاجه مش كويسه

كلّ زول براو

هى سودانا بكره

من سودانا ناو

تكتب انت تقرا

تعرف السياسه

فى محل حراسه

حجرة الدراسه

تمشى انت تلقى

فى الضلمه..لمبه

ألف ضحكه حلوه

تسندك بجنبه

بى تمن طبنجه

أحسن الكمنجه

أحلى شتل منقه

أحسن الحليب

إيد .. وإيد وإيد

نزرع الجديد

غابة النشيد

إيد..وإيد وإيد

مافى بينا سيد

إيد..وإيد وإيد

نلحق البعيد

نحنه مش مرقنا

حته واحده جينا

جينا لى السرقنا

حقّنا..وعصينا

دمّنا..وعرقنا

ولّعوا الرتينا

*

عَشّه..كلّمينا

ميرى ..ذكّرينا

كلّ سنكى أحسن

يبقى ..مسطرينا

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




مريم ومي
مريم ومى (أخياتي) وحشتنى ولعبتن بى
تحياتى ..
تصحووا امامى اشواقاّ تهز النبض وتتاقى
عميقاُ من شعاب النور الاقى الذكرى بتاتى
سلاماً يا حماماتى اسكنن فى مسامتى
سلاماً يا غماماتى البتدني ابتساماتى
مريم ومى (أخياتي) وحشتنى ولعبتن بى..

**
يسافر قلبى صوتي يرن يسابق الريح
قلب (الأخ) انت صحيح تحن وتهم
حذاراك من الجواك وحذراك من جرى التبريح
حتهرب منه جلدك وين ويوماً ما حتسكت تم
واخط رأسى وافارق دنيتى وناسى
واخلى وراي كراسى
وما أسود سطر بالشين
وما تعود اساك العين
وما تشمت عدوي فينى
مريم ومى (أخياتي) وحشتنى ولعبتن بى

***
طريق الشعب اوسع من زحام الطين
وقلب الشعب ارحب من رحاب الضو
ونبض الشعب كلو حلم بداه بيتم
وتطلع من شقوق الارض آلاف المدن قامات
ويطلع حتى من قلب الحجر والصى
شجر متشابك الهامات
وجيل جاى حلو الشهد
صبايا وفتية يمرحوا فى صباح الغد
عيونهم برقهن لماح سؤالهم رد
خفاف ولطاف وثابين أوان الجد
دفاعا عن حياض السلم والافصاح

سلموا لى عليهم
سلموا لى عليهم جملة
حتى اللسه قبل الخلق والتكوين
صناع الحياة اليوماتى ملح الارض
نبض الشعر والموسيقى والتلوين
هدامين قلاع الخوف
كانت هذه الدراجة يوماً ما كلاشنكوف
مابين منارات السمع والشوف
نقاشين فى جدار الصمت
نساجين خيوط الشمس كهربجيةالظلمات
واجمل ما تكون الدنيا
رسامين حفاريين مجارى العصر
نصرا نصر حروفاً واحلالى تشمهن ترتاح
ح حرية ت تغيير ت تعليم ك كتاب م مسمار
ح حرية ت تغيير ت تعليم ج جراح
سكة حديد تهز وترز
ب بحارة بحراُ عب وثار
وطن مدرار جرت تتلاحق الانهار
كما تتلاحق الاعراف
كما تتمازج الالوان
كما تتصافح الاديان
كما تتمازج الالوان
هجيناً من سلالات الفخار والعز
مرور النسمة وايضاً هبة الاعصار
علم فى نشرة الاخبار
وهيبة على امتداد الكون
علماً فى حماه الوردة حتى الزهرة والمريخ
شبه حرب النجوم انزاح
ايادى القهر خلف الظهر مكتوفين
افاعى السحت حيث مزابل التاريخ

***

سلموا لى عليهم جملة
حتى اللسة قبل الخلق والتكوين
بشوفهم كلهم أسه
عصافيراً ترك جنبى
نوافيراً ترش قلبى
حماماتى بتشرب حسه من ايدى
مريم ومى (أخياتي) سمعتن صوتى جيتن هى
مريم ومى (أخياتي) سمعتن حسى جيتن هى
طلعتن من زوايا السجن كاللبلاب
وبين السنكى والترباس وبالرقراق وحلق الباب
وعبر السور زى النجمة والعصفور
تجرن جدولاً رقاق
من حبل العشم فتلات
ومن حقل الوطن شتلات
امكن الفى قلب جيتن لى
من تيابها شراع
ومنديلأ خيوطو شعاع
وكراسا مسطر بالضحى اللماع
وخط ايدا وشعورا الحي

وقالت لى قالت لى وقالت لى
سلاماً يا (اخو) مريم ومى
ثباتك شعلة فى ايدى
(أخياتك) خلي راسن فوق
وحاشاك الكلام النى
وحاتك ما انكسرنه وراك
ولابد أن يعود الحى
وفجراً كالكرِب حيبين
وشعب تترب حيقوم
ويملا شوارع الخرطوم
وتجري مدامع الحلال
تجر النم تسوى القوق
فوق فوق سودانا فوق سودانا فوق

***


بدل شاهيك اشرب دم اذا قلت الكلام النى
وانا الما عندى ليهن شىء
لا فى البنك ولا فى الدين سوى الكلمة الما بتنداس
ولا بصبح مكانا الرف ولا عصفورة جوه الكف
ولا صقراً يحلق فوق وينزل كف
نبض الشعب اجمل من بريق الماس
واجمل من حليب الستره ما حبيت مشارب كاس
و القمرية بين اغصانا اشرف من موائد ناس
واقرب للوطن من ناس
وخيراً جانا ما عم البلد وسواس
أذن فلتقرع الاجراس
مريم حضرى الكراس
(عديلة) ومى تعالن جاى نغنى لاخر المشوار
نغنى لاخر الانفاس
نغنى لاخر المشوار
نغنى لاخر الانفاس


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





حنبنيهو

البنحلم بيهو يوماتى
وطن شامخ
وطن عاتى
وطن خيّر ديمقراطى

وطن مالك زمام أمرو
ومتوهج لهب جمرو

وطن غالى
نجومو تلالى فى العالى
إراده سياده حريّه

مكان الفرد تتقدم
قيادتنا الجماعيّه

مكان السجنِ مستشفى
مكان المنفى كليّه

مكان الأسري ورديّه
مكان الحسره أغنيّه

مكان الطلقه عصفوره
تحلق حول نافوره
تمازج شُفّع الروضه

حنبنيهو

البنحلم بيهو يوماتى


وطن للسلم أجنحتو
ضد الحرب أسلحتو
عدد مافوق ما تحتو
مدد للأرض محتله
سند للإيدو ملويّه


حنبنيهو.

البنحلم بيهو يوماتى
وطن حدّادى مدّادى
ما بنبنيهو فرّادى
ولا بالضجه فى الرادى
ولا الخطب الحماسيّه

وطن بالفيهو نتساوى
نحلم. .نقرا ..نتداوى
مساكن كهربا ومويه
تحتنا الظلمه تتهاوى
نختّ الفجرِ طاقيّه

وتطلع شمس مقهوره
بخط الشعب ممهوره
تخلي الدنيا مبهوره
إراده وحده شعبيّه
سفيو
03-10-2008, 20:03
مع السلامة
كنت عايزك للطويله..
وللأمانى المستحيله
وكنت محتاجلك معاى
والليله بهرب من وسايدى
من نجيمات المسا..
العنّك بتسال
ومن قصايدى
الليله بهرب من ملامحك
حتى من فكرة اسامحك
من الدروب الجينا بيها
وأىّ حتّه مشينا ليها
ومن حنينى الكان بيحلم
لو أماسيكِ
واصابحك..
قلبى كم حّباك ياما..
خَلّى يرحل بالسلامه
مع السلامه
مع السلامه


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




حلم
مرة شفتك فى المنام
وانتِ بين سربين حمام
نازله سكّه وادى أخضر
شايله سلّة ورد أحمر
وحزمتين أحلى الكلام
يتبعوك طفلين حلاوه
طاروا عصفورين علىَّ
ركّوا فى اسود عينىّ
ورحت في غمرة ندواه
كنتَ مُجْهد
قلبي فَرْهد
ورشّ أيامى الغمام
صحيت وقفت
مشيت أعاين
القى بينى وبين عيونك
كم ضواحى
وكم مداين
وانطوت كل الجناين
فى غيابك
وفى الظلام

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





ليلة الميلاد
*‏*‏*‏*‏*‏*‏*‏
يا مشتل فرحنا الشال
ويا مرسى الشراع الضال
ويا واحة قليباً كان زمان رحال
يفتش عن عيون إنسانة
ينسى لديها حزناً طال
ولما لقاك فرهد ياما
بالفرح اللي عندو محال
ولما لقاك رسلو القمر منديل
وركت نجمه ...
ضوت في الدرب قنديل
وهشت زهرة ..
كانت تبكي طول الليل
وجات من بعد دول الهجرة ..
غنوات الحروف
وكانت ليلة الميلاد...
سفيو
03-10-2008, 20:10
ياوالدة يامريم التي سطرها في والدته مريم
يا والدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية

يا والدة يا مريم

ما ني الوليد العاق ... لا خنتّ لا سراق
والعسكري الفراق ... بين قلبك الساساق
وبيني هو البندم ... والدايرو ما بنتم

يا والدة يا مريم

عارف حنانك ليّ راجيك تلوليني
دايماً تقيليني وفى العين تشيليني
ألقاه عز الليل قلبك يدفيني
ضلك عليَّ مشرور قيلت فى سنيني
أنا لو تعرفيني لو تعرفي الفيني
أنا كم بحبك كم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم

طول النهار والليل فى عيني شايلك شيل
لكني شادّي الحيل لا خوف عليَّ لا هم
هاك قلبي ليك منديل الدمعة لما تسيل
قشيها يا مريم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم



يا والدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية

يا والدة يا مريم

ما ني الوليد العاق ... لا خنتّ لا سراق
والعسكري الفراق ... بين قلبك الساساق
وبيني هو البندم ... والدايرو ما بنتم

يا والدة يا مريم

عارف حنانك ليّ راجيك تلوليني
دايماً تقيليني وفى العين تشيليني
ألقاه عز الليل قلبك يدفيني
ضلك عليَّ مشرور قيلت فى سنيني
أنا لو تعرفيني لو تعرفي الفيني
أنا كم بحبك كم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم

طول النهار والليل فى عيني شايلك شيل
لكني شادّي الحيل لا خوف عليَّ لا هم
هاك قلبي ليك منديل الدمعة لما تسيل
قشيها يا مريم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





مساجينك
مساجينك مساجينك
نغرد فى زنازينك
عصافيرا مجرحه بى سكاكينك
نغني ونحن في أسرك
وترجف وأنت في قصرك
سماواتك دخاخينك

برغمك نحن ما زلنا
بنعشق فى سلاسلنا
بنسخر من زنازنا
وبنسخر من زنازينك

للسودان مواقفنا
وللسودان عواطفنا
ولما تهب عواصفنا
فما حيلة قوانينك


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



عشرة مقاطع للحياة

( 1 )

غطى الجبال الليل
لكن هدير السيل
لكن صهيل الخيل
نار الغضب والجوع
تحت الجبل مسموع
يضووا عز الليل

( 2 )

والموج شديد الظلام
غطى الشهيد الهمام
لكن دماهو بتقيد
لكن طريقو المجيد
ابداً شديد الزحام
رايات ترفرف غمام
ينزل رزاز النشيد
والنجمة تلمع هناك
رغم المكان البعيد

( 3 )

والنهر عبر السنين
يزحف بعنف وبلين
في الليل بيلمع يبين
فارس بسيفو السنين
يحمينا حضنو الامين
نطلع بكتفوا الشمال
ننزل بكتفوا اليمين
لكنو مين يقدر يقول
أنا سيدو مين

( 4 )

في منحنى الدرب الطويل
الحبة تفلت من جراب
عابر سبيل مسكين هزيل
عطشان يموت في السكة
ما يتم الرحيل
تكبر تشيل تلبس جميل
تصبح مقيل عابر سبيل

( 5 )

عصفورة من أخر بلاد
في رحلة لي أخر بلاد
تعرف مواعيد الحصاد
وكل دورات الفصول
وأنضر ايام الحقول
وتعادي أسراب الجراد
وتنادي لوكركب زناد
صياد على العش والولاد

( 6 )

أنسانة ابسط ما يقال
لو صاح
اعز من النساوين الرجال
أنثى ولا دستة رجال
تمشي وما بتطأطي
ما بين بير وشاطي
تطلع عالي واطي
نهارها مع السواقي
وليلها مع الطواقي
وعمرها للجهال

( 7 )

والنملة في الصف العجيب
وعلى انفراد
نفس النشاط والأنضباط
نفس الحماس
تسعى وتجيب ولا من رقيب
ولا حتي في الأمر التباس
ولا في اختلاس
أحسن كتير من بعض ناس
ولا في اختلاس
وهيلا .. وهيلا هيلا .. هيلا
تلقى تفسها في سفينة
وهيلا .. وهيلا هيلا .. هيلا
تاني في شارع مدينة
والحكمة بنفس الحماس
تلقاها في الصف العجيب
كم مرة تهرب من مداس
من طفل عابث ومن لهيب
بالحبة تمسك في عناد
الحبة ملك الاتحاد

( 8 )

والحكمة في مر السحاب
والعلاقة البينو ما بين الجذور
واللسة في الباطن بذور
وغنا الطيور
والمعركة الدارت تصلصل
بسيوفها وبالحراب
والعلاقة البينو بين الغابة والهبابة
والربابة والمنديل
ومجرى النيل وضلفة باب
وبكية طفلة في الكتّاب
تفتش عن قلم رصاص
وقع في الباص
وحس رصاص هدر في ناحية
فيها العيش حكر للجيش
بتاكل من زمن مافيش
وتشرب من زمن مافيش
وكان اضراب

( 9 )

والشمس تطلع يبين
ادق ما في الجبال
تبدأ الموانئ العظيمة الهدور
وتصحى المصانه بيهمة وتدور
ووتملأ الشوارع وكل الجسور
وتشفى الصدور
جموع الشغيله خطاها ثقيلة
تخلى القصور تحس بالفتور
وحمى الزوال

( 10 )

تصحى المدينة
تقوم تستحم وتولع سيجارة
تدخن تسخن بشاى الصباح
وحق الملاح وسيد الجزارة
وتقعد تدندن تخيط زرارة
ترتق هدوما وتفتق هموما
وتسب الحكومة وتفن الريال
وتنفض سريعاً غبار النعال
وتنزل تواجه مشاكل عويصه
تشرّط قميصا وتدق العيال
ليه العيال يعيش النضال
يخلى الحكومة تدخن تسخن
بنار الكفاح
وتقعد تطنطن لحدي الصباح
بتطلع بتطلع حزينة وكتومة
تشرّط هدوما وتحش المصحة
يعيش الأصح يعيش النضال
وضروري النضال


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





باكر تعرف تقرى وتكتب
*******************


باكر تعرف تقرا وتكتب
وياما ترتب
نحنا بنحلم وكم نتمني
هل تحقق كل ما تحب
تبني حياتا الند بالند
اي مكانة وخانة تسد
هدهدا هدهد كل الورد ينوم ويفرهد
زي عصفورة تطير وترك
تحبا وتمسك وتاني تفك
سيبا تفكفك سيبا تلكلك عايزة تنطط
بكرة حترسم وياما تخطط
بكرة حا يبنوا مدائن ضو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب
افتح بابك آمن تب
زي ما النهر بيلقي مصب
اي حمامة بتلقي الحب
تلقي الورده الندي في الكم
تلقي حداها جناها الام
يرضع صافي حليب الحب
نقدل نحن الجد والعم
تملا عيونا كهارب سد
بابا جاب الهم والزم والصد ينسد
نفرح لما ندمع جد
مد البصر الامل يمتد
العمل يشتد البنا ينتم الغنا يمتد
هدهدا هدهد
اكتبي اكتبي الف المد
حمام وسلام وسعادة بجد
اكتبي اكتبي ياء المد
سرير وعصير وعبير ينشم
اكتبي اكتبي واو المد
حقول وعقول تقرا المجهول كتاب الغد
اكتبي علم وسلم
لا حد يئن لا تسمع بم
لا ينزف دم
لا يعجز رد
لا يعجز طب
لا دمعه في خد
تبتبا تبتبا تبتبا تبتب


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




في رثاء عبد الخالق محجوب:

أهلا مرحب .. ايوه اتفضل" نادانى

مشيتلو..
مصدق وما مصدق

سلمت بقلبي واحضانى

وشعرت كأنه بيعرفنى

شعرت كأنه بيقرانى

راجل نكته عميق ومهذب

رائع جدا وانسانى

ولما جمعنى وشجعنى

سألتو بدهشة عن الحاصل

قاطعنى .. "بتعنى الاعدام؟

اعدامنا .. بتقصد اعدام؟

الموت لو شنقا حتى الموت

الموت .. لو رميا بالرصاص

ما هو الموت"

"الشعب يقرر من الحى والميت مين

الشعب يقرر مين الحى والميت مين

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





كـــجبار

الدم شلال ..... السد ارواح
الموج اترنح في الحلال اتراح اتراح
شهداء حياتم يا لله تلال .. وظلال
ومعيشة حلال..... وضمير مرتاح
تاح... تاح .... تاح.... تاح

بينم وبين الحبة محبة
وبينم وبين الضفة صراح
جنا يا حليلو سبيط اتدلي... مرصص راح
كم الورد صباهو .. عيونو لسع فيهن باقي مزاح
اسال عنو حفيف العشب لم يكسر في عمرو جناح
غني معاهو القمري زمانك حسع راح

بابا جاب الهم والذم والسد ينسد وحسع ينزاح
بابا جاب الهم والذم والسد ينسد يوما ينزاح
نحن كذلك برضو كفاية ....
كفاية كفاية كفاية جراح
اي زيادة حنبقي نفاية
ويبقي الطمي في العين سفاية
وكل وطنا بيوت اشباح
اهي دارفور الصمت رماها جياع وحفايا
وآ اسفايا وآ اسفايا كاني بايدي طعنت قفايا
كفاية كفاية كفاية كفاية حريق وصياح
ويا ادروب سامحنا سكتنا
عرق اتصبب .. ودمك ساح
سلك.. وزلك..راحل ضلك..منهك كلك ليل وصباح
ويوم فتحتو وراكم.. تاح ترراح... تاح ترراح
السودان الوطن الواحد شبرا شبرا بقي نتاح
يا اشعار العار العار اذا ما الحنضل بقي تفاح
وتم تررم.... مع تاح ترراح
كم سفاح ارتاح واتقدل.... والكاتلنا انحنا سماح
اعتي دروع وجذوع تتهاوي.. وشتلة تقاوم اعتي رياح


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





هذه هى قصيدة الحرامي التي كتبها محجوب في صديقه (اللص) الذي أتوا به إلي السجن مضروبا وصار صديق زنزانة وعلم محجوب لعبة السيجة.

الحرامي


صحيت بالمؤذن وحالتك تحزن
مرقت وسرقت الوبال
معكز ملكز بسيخة ونعال
مكتف ملتف بأغلظ حبال
وغيرك بخزن جميع الغلال
يسرق ويهرب جمال
باسمه اللواري تهد الكباري تباري الجبال
سيادته يتدبر شئونه الأماسي
يرش الحديقة ويرص الكراسي
ما بين الغواني ورنين الخماسي
تعاين تشوفه تقول دبلوماسي
يمضي ويرضي ويهدي المحال
كمان لو تلاحظ صديقه المحافظ
وقالوا الملاحظ عيونه الجواحظ تباري الريال
حليلك بتسرق سفنجة وملاية
وغيرك بيسرق خروف السماية
وفى واحد لو تصدق بيسرق ولاية
ودا أصل الحكاية وضروري النضال
ضروري النضال

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





البطاقة الشخصية
الاسم الكامل
انسان
الشعب الطيب والدي
الشعب حبيبي وشرياني
اداني بطاقة شخصية
من غيرو الدنيا وقبالو
قدامي جزائر وهمية
لا لون
لا طعم
لا ريحة
وايام مطفية مصابيحها
زي نجمة بعيدة ومنسية
المهنة :
بناضل وبتعلم...
تلميذ في مدرسة الشعب
المدرسة..
فاتحة علي الشارع
والشارع فاتح علي القلب
والقلب مساكن شعبية


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




للسودان
للسودان مواقفنا
وللسودان عواطفنا
ولما تهب عواصفنا
فما حيلة قوانينك
*************************

هجين الدبله و الخاتم
سلالة كم وكم حاجه
متل الستره وهاجه
بحتم الدوله لا حوله
باوراقا الثبوتيه
صبحت في خبر كان
للي كانت ليها محتاجه
المسيكينه
ما تسألني كم تمن الغويشايه
بل جاوبني كم تمن الطمأنينة

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



في انتظارِك .. في انتظارِك .. في انتظارِك
وفي شراييني بيدمدم حِس قطارِك
لو أطير من سجني وانزل في جوارِك
وعنِك أمسح بي رموش العين غبارِك
وأملأ عيني من نهارِك
انتِ يا صحو المدارِك
كل نجمة جميلة تلمع في مدارِك
واي نسمة حنينة دارِك
وكل نخلة ظليلة عندها من ثمارِك
وباختياري وباختيارِك
كم نشارك في المعارك
وما بنخلي فرسنا بارِك
وما بنقيف نستنا في الآخر نبارِك
شدي ايدي وتبقي زادي
نظرة من عينيك تنادي
يا بلادي .. يا بلادي .. يا بلادي
وكلمة منك جمرة للفداء في فؤادي
يوم اجيك وعلي جبيني وسم عنادي
ولا مُتّ وراي يجيك يعتب جوادي
ولا خُفت وفتَّ منك غادي غادي
انتي ما الحضن البلِّم من ساحة هارب
ولا البِّنكِّس راسو من الذلة شارب
ولا البِّدس الراية في قش المغارب
انتي ساحل لما عصف الموج يضارب
وانتي صافي النبع في سكة محارب
وانا وانتي حدين سيف سنين وسوا بنحارب
سلميلي علي البحسو بكل نبض الارض ديه
وسليميلي علي مهيريات شهيدن نارو حية
وسلميلي علي رفاقي وعن حياتهم قولي ليَّ
وسليميلي علي حبايب في زوايا المغربية
وقولي ليهم حبو غنو الدنيا ما زالت ندية
وما حنقبل في وطنا الغالي دية
وما بنخلي وطن سبية
ولا وطن زوجين وحارس وبندقية


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



ست البنات

محجوب شريف

ست البنات اتمالكت اعصابا
احلامها اتكت

بكت الشبابيك

التي نورا انطفا

فقدت حنان الهمبريب

والالفة والشمس البتضحك

وانسياب الدردشة

نار الكوانين انطفت

إلا البتوقد في الحشا

حق الفطور

يمه العشا

ما باباليكم يا جناي

اصبر كفى

أدت رضيع الأشهر الأولى .. القفا

ثم انكفت

غرقت غرق في دمعتا

عشم العشم نقطة حليبا تسكتو

ولا حتى كسرة تسند

من ما مشى

ما اشرف الدمع الجسور

إذا جرى

من عين والدة سعت

وبكل ما ملكت يداها وصحتا

داست هموما الداستا

مرقت تفتش في الشغل

كم مهنة حامت كاستا

نكتت شهادات الزمن

ما كان تخلى دراستا

رمت اللقيمات الدغش

والكسرة قامت عاستا

كم حاجة عندها باعتا

دبلة زوجا وساعتا

ترخص حياتا .. وكل شئ

بس سمعتا

ياالله ما اطول خميسا وجمعتا

احد أحد.. احد احد

جر السبت حبل الأحد

احد احد

واليوم يجر الثاني والثالث

كما ود الأحد

احد احد

احد احد

احد احد حيلا انتهى

يا منتهى الصبر البخلي السترة

قاب قوسين وادنى

من الذي ما يشبها

يا منتهى الصبر البخلي السترة

ترخص حياتا .. وكل شئ

بس سمعتا

بس سمعتا

بس سمعتا


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




أهلا أهلا بالأعياد

محجوب شريف

أهلا أهلا بالأعياد

مرحب مرحب يا أجداد

أفتح أفتح يا تاريخ

أبعاد أبعاد

وأملا عيون كل الأحفاد

بالأمجاد

أفتح محضر باسم الشعب

بخط الشعب

لوجه الشعب

ومجد الشعب

سجل
أنحن الغضب الواعى

ضمير الثورة على استعداد

وبالمرصاد

لكل عميل وكل دخيل

بالمرصاد

سجل سجل

لا أغلال

لا إستقلال مع إستغلال

لا حرية بلا استبسال

إستشهاد باستمرار

على استعداد

ويا استبداد

خط النار إتعب وزاد

وقول للشهدا الختو الزاد

باسمنا هتفو

وبينهم وبين
الموت خطوات

الجايين من قلب الشارع

والجايين لى قلب الشارع

من ثكنات

سجل أنحنا

برغم جرحنا

إجتزنا المحنة

ونحن الليلة أشد ثبات

ونحن بخير

ونحن وراكم في الجايات

ولسه ولسه

على إستعداد

وشعبنا واقف بالمرصاد
سفيو

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





محجوب شريف
عمّـــا قريـب
عمّا قريب..
الهمبريب
يفتح شبابيك الحبيب
والحال يطيب
يا محمد أحمد تستجِمْ
والبيت يتمْ
تتلم تلمْ
تفرح فرح
تحلم حِلِم
كم تطمئن
حقك يجيك لافيهو شك..
يمكن واظن
ويفوتو همْ
والعدل يعمْ
وتغني أمْ
كادت تجن
كبر الولد جُوّا السجن
فاقداهو هى
دا كلو كلو ينتهى
دا كلو كلو ينبهى
زولاً تريدو وتَشْتهِى
تلقاهو فى
لا فى السِّجِن..
لا مختفى
لا يقولو ليك ما تمشي لى
دا كلّو كلّو ينتهى
دا كلّو كلّو ينتهى
دا كلّو كلّو ينتهى

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





فديتك

محجوب شريف

بقيت يا وطنى زى منفاى

مطارد ومستباحة دماى

عساكر من دروب تايهات

حداى، قدام خطاى

ووراى

وذنوبى هواى

يا موطنى وغناى

وذنبى ولاى

وإنك سيدى ومولاى

تعيش يا ذنبى طول ما عشت

عشت معاى

لا عنك بحيد لا جاى بفوت

لا جاى

فديتك يا مديد القامة

يا شعبا، سديد الراى

وقلبى عليك يا حجرا

حنين دفاى

أقبل وين أفوتك

وفي حماك حماى

أسيب عزاى سبية

وكيفن ألقى عزاى

عزاى في وحشتى وسلواى

عيونا وبحة الغناى

نخيلك تمره منه صباى

ونيلك في قواى

هادر هميم جراى

وقبضة إيدى مسكة رمحك

الرماى

أطالع في صحارى الليل

مطالع صبحك الضواى

فديتك لو بقيت منفاى

فديتك لو بقيت مرساى


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





قزازة دم

واحلالي القبلي شال شبال لمع برق المهيرة
قيرة قيرة يا مطيره
يا رزاز الدم حبابك
لما يبقى الجرح عرضة ولما نمشي الحزن سيرة
من دمانا الأرض شربت موية عزبة
كل ذرة رملة شربت حبة حبة
موية أحمر لونها قاني
فتقت ورد الأغاني
تهدي لى اسمك رمزاً للوطن كنز المحبة
قيرة قيرة يا مطيرة يا شهيد الشعب أهلاً
مش بتطلع كل يوم الشمس أجمل
وكل يوم النخل أطول زيدو قامة
وياما شفتك ياما ياما
لما شفت البدر طالع فى سما الوطن ابتسامة
إنتّ فى النهر البسافر جاري طول العمر صاحي
طبعو منك يا الملامحك من ضفافي
واللي شافك مرة شافو
واسمك الختيتو فرهد عشب أخضر فى الجناين
فى الشوارع نيمة نيمة فى مصابيح المدينة
فى فوانيس الضواحي
تملا نادي الحلة سيرتك
اسمك الخلانا نقدر فى ظلام الليل نعاين
والبتسأل عنو ده الخليتو شافع
لسه دابو
يا ما حيعجبك ، شنابو
صوتو رقان فيهو بحة
ود فلان اصرار وصحة
عندو قصة حب جميلة
جرب آلام الحراسة وحرض أولاد الدراسة
وهدّو حيل العسكرية
البنية أم طرحة كبرت
يا سلام الفنجرية
ليها راية وبى كلامها وبى اهتماماتها الجديدة
دقت أجراس القصيدة وشدت أوتار الصلابة
الكتوف اتلاحقت فى السكة يابا
واحلالي القبلي شال شبال لمع برق المهيرة
قيرة قيرة يا مطيرة يارزاز الدم حبابك
لما يبقى الجرح عرضة
ولما نمشي الحزن سيرة


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



السودان الوطن الواحد

مارس حارس ليس يخون
الألف
اللام
السين
الواو
الدال
الألف
النون
السودان الوطن الواحد
ما قد كان وما سيكون

*
مارس ماسك كتف ابريل
أعظم شعب...
وأعظم جيل
نعمَ بنادق لا ترتد
لصدر الشعب..
الغدر دخيل

*
شعباً صمم فرداً فرد
هبّ وهدّم حكم الفرد
وجاهو عديل
إعصار إعصار
خطوه بخطوه..
وايد على ايد
وسِلّم سِلّم
ما بنسلم
وشعب معلم..
قال اصرار:
عصينا عصينا
على الحريه منو بوصينا؟
نحن الشعب المابحتار..
اختار اختار
ديمقراطيه
بلا أميّه
بأيدى قويه
نحفر أعمق..
نرمى الساس
للسودان الوطن الحر
مرفوع الراس
للحريه بلا دوريّه
ولا تفتيش
ولا حق ينداس

*
ديمقراطيه عمود النور
ولما تغطى حقول القمح..
الأرض البور
والمكنه تدور
وترفع صوتك يا مقهور
وبينا وبين العالم سد
ينهدّ..
وسور

*
مارس حارس ليس يخون
الألف
اللام
السين
الواو
الدال
الألف
النون
السودان الوطن الواحد
ما قد كان وما سيكون


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




بلا وانجلى - محجوب شريف


بلا وانجلى
بلا وانجلى
حمد الله الف على السلامه
انهّ كتف المقصله
والسجن ..
ترباسو انخلع
تحت انفجار الزلزله
والشعب ..
بى أسرو اندلع
حرر مساجينو اندلع
قرّر ختام المهزله
يا شارعاً ..
سوّا البدع
اذهلت أسماع الملا
كالبحر ..
دواى الجلجه
فتحت شبابيكا المدن
للشمسِ
واتشابا الخلا

شفت البنادق فى السما
الظبط والربط انتمى
للشعب..
شعب الملحمه
الصرخه كانت همهمه
والهبه كانت ململه

سداً منيعاً يا وطن
يا شعب وهّاج الفطن
للظلم يوماً ما ركع
مهما جرى
تباً لعهد السمسره
والنهب..
ثمّ السمسره
سداً منيعاً يا وطن
صه يا طنين البلبله
أبدا ً لحكم الفرد..
لا
بالدم لحكم الفرد..
لا
تحيا الديمقراطيه
كم نفديك يا مستقبلا
بلا وانجلى
بلا وانجلى
حمد الله الف علي السلامه
انهدّ كتف المقصله

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®


تبتبا تبتبا تبتبا تبتب

باكر تعرف تقرا وتكتب

وياما ترتب

نحنا بنحلم وكم نتمنى

هي تحقق كل ما تحب

تبني حياتا الند بالند

اي مكانة وخانة تسد

هدهدا هدهد

كل الورد ينوم ويفرهد

زي عصفورة تطير وترك

تحبى وتمسك وتاني تفك

سيبا تفكفك

سيبا تلكلك عايزة تنطط

بكرة حترسم وياما تخطط

بكرة حا يبنوا مدائن ضو

ما بيعكر صفو الجو صفارة حرب

تشطب من قاموس الدنيا

الضرب الشك الخوف

ينعموا كم بالشم والشوف واغاني الحب

افتح بابك آمن تب

زي ما النهر بيلقى مصب

اي حمامة بتلقى الحب

تلقى الورده الندى في الكم

تلقى حداها جناها الام

يرضع صافي حليب الحب

نقدل نحنا الجد والعم

تملا عيونا كهارب سد

باباً جاب الهم والزم والصد ينسد

نفرح لما ندمع جد

مد البصر الامل يمتد

العمل يشتد البنا ينتم الغنا يمتد

هدهدا هدهد

اكتبي اكتبي الف المد

حمام وسلام وسعادة بجد

اكتبي اكتبي ياء المد

سرير وعصير وعبير ينشم

اكتبي اكتبي واو المد

حقول وعقول تقرا المجهول كتاب الغد

اكتبي علم وسلم

لا حد يئن لاتسمع بم

لا ينزف دم

لا يعجز رد

لا يعجز طب

لا دمعه في خد

تبتبا تبتبا تبتبا تبتب


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





يا اللي بتسمع والما بتسمع


لازم تفتح اضانك وتسمع
صوت الشارع لمن يدوي
كل قلاع الخونة بتهوي
وكل جباه الكهنة بتركع
وشمس الحق السرقو شعاعها
بكرة بامر الشعب بتطلع
ياللي بتسمع
والما بتسمع
نحن اسودا ما بتدجن
ونحن سدودا ما بتهدن
ونحن جبلا ما بتصدع
لملم ناسك ولحمة راسك
وارفع ايدك عننا ارفع
يا اللي بتسمع
والما بتسمع
لو بي بنادقك ما بترهبنا
ولو بى خنادقك ما بترعبنا
*****
والتاريخ يا جاهل بيشهد
والايام لسع بيناتنا
وكل الحق الضايع بيرجع
يا اللي بتسمع
والما بتسمع
اسأل كل العسكر قبلك
وكل الحاول فكر متلك
الاستأسد والاتنمر
مهما استعلا ومهما استكبر
برضو في يوم الغضبة بيهلك
وبيلقى مصيرو نفس المصرع
واننا أمة عظية اصيلة
لينا خصايص ما في مثيلها
وفينا طباع بالفطرة نبيلة
والاسلام ما جانا الليلة
ولا اخلاقو علينا دخيلة
الايمان من بدري سبيلنا
والقرآن في الصدر دليلنا
انقى وارقى واسمى وارفع
يا اللي بتسمع
والما بتسمع
نحكي ليك لو كان ما بتعرف
حاجة بسيطة بس عن ماضينا
انحنا رضعنا الثورة رضاعة
وبالوطنية انحنا ربينا
التدجيل ما بنفع فينا
والتضليل ما بيمشي علينا
انحنا عبرنا السكة مشينا
وشفنا عدونا وشفنا صفينا
وما بنهاب لا سيخ لا مدفع
يا اللي بتسمع
والما بتسمع
الانقاذ ما بالدبابة
ولا احلام شايلاها سحابة
ولا اوهام عالم كضابة
ولا ارقام خاوية وخلابة
والاصلاح ما جربندية
الاصلاح ما بالزندية
الاصلاح عدل وحرية
الاصلاح موضوع وقضية
الاصلاح عزقة وطورية
نحن بنفكر بتاريخنا
يا اللي بتسمع
والما بتسمع
نحن اولاد الوطن الواحد
متسامحين من يوم ما قمنا
عشنا حبايب ولسه حبايب
ما اتخاصمنا ولا اتصادقنا
فينا مساجد بتهليلها
وفينا كنايس بي انجيلها
وفينا معابد يسرج ليلها
ربنا واحد وشعبنا واحد
وحبنا واحد ودربنا واحد
يا اللي بتسمع
والما بتسمع
دايرين نختم نحن كلامنا
ودايرين نحسن نحن ختامنا
للاحرار نديها تحية
وللثوار تعظيم وسلام
نحن الفوق الشمس مقامنا
ونحن جبين الثمسر مرامنا
ونحن وقود الحارة ونارها
ونحن منية الباغي سهامها
الا ارادة المولى ارادت
حكمت فينا وفي حكامنا
بعد ما ازهري كان هو زعيمنا
بعد المهدي الصلى امامنا
بعده الغرد الضوو جبينا
بعد الدرر الزانو زمانا
جات البقرة عشان تحكمنا
وام رخم الله مشت قدامنا
جل جلالة الملك الواحد
يأتي وينزع
ويعطي ويمنع
ويخفض ويوفع
يا اللي بتسمع
والما بتسمع
يومك قرب يا ظالمنا
وبكرة حناخد منك تارنا وما بنرجاهو حساب الآخرة
داكا حصابا من غفارنا
يمكن يصفح ويمكن يسمح
ويمكن يعدك من اشرارنا
الا انحنا حسابنا براهو
يوم الحارة بتوقد نارنا
تحصد كل الداسو حقوقنا
تحرق كل الخربو ديارنا
دايرين نعرف وين شهدانا
دايرين نعرف وين ابرارنا
والشرفا الراحو اوانطة من طلابنا ومن احرارنا
والآلاف الشردتوها من خبراتنا ومن اخيارنا
والمؤتمرات الدبلجتوها من اخوانا ومن اعمارنا
نحن عرفنا البير وغطاها
ونحن خلاص قرارنا
ونحن حنضرب كل العملا
ونحن حنصلب كل الجهلا
نحن حنغبن عصابة القتلة
ومن الباغي حناخد تارنا
وعالية ترفرف راية العزة
وغالية عزيزة حترجع دارنا
ونور الفجر القادم يسطع
يا اللي بتسمع
والما بتسمع



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://zankalooni.hooxs.com
Admin
Admin
avatar

المساهمات : 35
تاريخ التسجيل : 12/11/2011
العمر : 27

مُساهمةموضوع: رد: مكتبة الشاعر محجوب شريف   الخميس ديسمبر 22, 2011 4:49 am

ﺑﻴﻦ ﺍﻟﻌﻤﻞ ﻭﺍﻟﺒﻴﺖ ﻓﺼّﺪ ﺟﺒﻴﻨﻬﺎ ﻋﺮﻕ.. ﺃﻡ ﺍﻟﻴﺘﺎﻣﻰ ﺑﻜﺖ ﻟﻤﻦ ﺣﺴﺎﺑﻬﺎ ﻓﺮﻕ ﻣﺎﻫﻴﺔ ﺗﻤﺸﻲ ﺍﻟﺴﻮﻕ ﻣﺮﻛﺐ ﻣﺼﻴﺮﻫﺎ ﻏﺮﻕ ﺣﻖ ﺍﻟﻠﺒﻦ ﻭﺍﻟﺰﻳﺖ ﺍﻟﻜﺴﺮﺓ ﻭﺍﻟﻜﺮﺍﺱ ﻫﻢ ﻓﻲ ﻋﻴﻮﻧﻬﺎ ﺑﺮﻕ ﺍﻟﻤﺎ ﺑﺤﺲ ﻣﺎ ﺑﻬﻢ ﻭﺍﻟﺨﺎﻥ ﻫﻤﻮﻣﻮ ﺳﺮﻕ ﻫﺬﺍ ﺍﻟﻤﺮﺗﺐ ﺗﺐ ﻣﺎ ﺑﺴﺪﻫﺎ ﺍﻟﻔﺮﻗﺔ.. ﺍﻟﻘﻌﺪﺓ ﻓﻲ ﺍﻟﻤﻜﺘﺐ ﻭﺍﻹﻣﻀﺎ ﻓﻲ ﺍﻟﻮﺭﻗﺔ ﺍﻟﻌﺒﺮﺓ ﻓﻲ ﺍﻟﺨﺒﺮﺓ ﺍﻷﻳﺪﻱ ﻟﻮ ﺗﻌﻤﻞ ﺟﺮﺡ ﺍﻟﺰﻣﻦ ﺑﺒﺮﺍ ﺍﺗﺒﺎﺻﺮﺕ ﻣﻜﻨﺔ ﻣﺎﻛﻮﻛﻬﺎ ﻳﺘﻘﺪّﻝ ﺑﻴﻦ ﺧﻴﻄﻬﺎ ﻭﺍﻹﺑﺮﺓ ﺯﻱ ﻣﺎ ﺍﻟﻘﻠﺐ ﺳﺎﺳﺎﻕ ﺍﻟﺨﻄﻮﺓ ﺳﺎﺳﺎﻗﺔ ﻭﻋﻴﻮﻧﻬﺎ ﻣﻨﺘﺒﻬﺔ ﺗﺒﺎﺭﻱ ﺯﻗﺰﺍﻗﻬﺎ ﻻ ﺷﻚ ﻭﻻ ﺷﺒﻬﺔ ﻭﺍﻟﺴﺘﺮﺓ ﺃﺷﻮﺍﻗﻬﺎ ﻭﺍﻟﺸﻔﻊ ﺍﻟﻘﺼﺮ ﻭﺍﻟﺪﻣﻌﺔ ﺭﻗﺮﺍﻗﺔ ﻳﺎ ﺣﻠﻴﻞ ﺷﺮﻳﻚ ﺍﻟﻌﻤﺮ ﺍﻟﺪﻧﻴﺎ ﻓﺮﺍﻗﺔ ﺍﺗﻴﻘﻨﺖ ﺃﺣﺴﻦ ﻣﻦ ﺗﺒﻘﻰ ﻧﻘﻨﺎﻗﺔ ﺷﻘﺸﻖ ﻣﻘﺺ ﻓﻲ ﻟﻴﻞ ﻧﺎﻣﺖ ﺧﻼﻳﻖ ﺍﻟﻠﻪ ﻃﺎﻳﺮ ﺳُﻘﺪ ﺣﻠّﻖ ﻓﻲ ﺑﻴﺘﻬﺎ ﻭﺍﺗﺪﻟّﻰ ﺗﺪّﻱ ﺍﻟﻮﻻﺩ ﺑﺼﺔ ﻭﺗﺠﺮﺏ ﺍﻟﻘﺼﺔ ﻭﺗﻘﻠّﺐ ﺍﻟﺤﻠﺔ ﺟﺎﻫﺰ ﻋﻤﻞ ﺑﻜﺮﺓ ﺃﺳﺄﻝ ﺗﻘﺎﺭﻳﺮﻫﺎ ﺍﻟﺴﺮﻳﺔ ﻭﺍﻟﺴﻤﻌﺔ ﻫﻞ ﺭﻛﻠﺴﺖ ﻳﻮﻣﺎً ﺣﺘﻰ ﻭﻟﻮ ﺟﻤﻌﺔ ﻣﺸﻜﻮﺭﺓ ﻓﻲ ﺍﻟﻤﻜﺘﺐ ﻣﺴﺘﻮﺭﺓ ﻓﻲ ﺍﻟﺤِﻠﺔ ﺭﻏﻢ ﺍﻟﺸﺠﻦ ﻫﺒﺖ ﻟﻢ ﺗﻌﺮﻑ ﺍﻟﺬﻟﺔ ﻣﺎ ﻓﺎﺭﻗﺖ ﺳﺮﺑﺎً ﺗﺘﻔﻬﻢ ﺍﻟﻤﻮﻗﻒ ﺗﺴﺘﺪﺭﻙ ﺍﻟﻌﻠﺔ ﻭﻟﻢ ﺗﻌﺪ ﺃﻣﺎً ﻣﺴﻜﻴﻨﺔ ﺑﺘﺸﻔِّﻖ ﺗﻔﺮﺗﻖ ﻭﺗﺮﺗﻖ ﻗُﺼﺎﺻﺔ ﻓﻲ ﺇﻳﺪﻫﺎ ﻛﺎﻟﻮﺭﺩﺓ ﺑﺘﺒﺘِّﻖ ﺭﻳﺎﻧﺔ ﻣﻨﺸﺮﺣﺔ ﻫﺪِﻡ ﻗﺪِﻡ ﻳﺼﺒﺢ ﻓﻲ ﻟﻤﺤﺔ ﻛﻢ ﻃﺮﺣﺔ ﻻ ﺑﺪ ﻣﻦ ﺗﻜﻴﺔ ﻻ ﺑﺪ ﻣﻦ ﺑﻜﻴﺔ ﻻ ﺑﺪ ﻣﻦ ﻏﻤﺪﺓ ﻻ ﺑﺪ ﻣﻦ ﺳﺮﺣﺔ ﺃﻧﻌﻢ ﺑﻬﺎ ﺃﻣﺎً ﺑﻴﻦ ﺍﻟﻌﻤﻞ ﻭﺍﻟﺒﻴﺖ ﻳﺎ ﻣﺮﺣﻰَ ﻳﺎ ﻣﺮﺣﻰَ
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://zankalooni.hooxs.com
 
مكتبة الشاعر محجوب شريف
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
zankalooni :: منتدى الشعر السوداني-
انتقل الى: