اشعار محمد طه القدال

اشعار محمد طه القدال

حليوة ليلة لمولد
بقول غنوات وأقول غنوات
فى البلد ا لبسير جنياتها لى قدام
ولى الولد البتل ضرعاتو فى العرضة
ويطير فى الدارة صقرية
ولو السمحة تلت إيد ومدت جيد
يقوم شايلاهو هاشمية
ويشيل شبال ختفة ريد وفرحة عيد
وريدة روح وحمرة عين وايدية
* * *
ويالولد البشيل مدقاقو
قولة خير على القمره
يقابل الجاية متحزم
ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
* * *
وقبال حول تغّيم غيمة قِبلية
ترش الدارة والحدبه الصعيد الحلة
ويا فرحة بتطارد الصفقة فى النسمة الصعيدية
ويا جهرة نهار الليلة بدرية
رحيح جنياتنا فى الحدبة الصعيد الحلة
* * *
يا سمحاتنا هو لبلب
ويا قمحاتنا هو لبلب
وياللوز الفتق فى الوادى هو لبلب
ويا سمحاتنا هو لبلب
ويالبحر الطمح مدّادى هو لبلب
سألتك بالذى ركز الارض معبد
وسوى الفاس عليها مقام
سألتك بى حشا الأُمات ودمعاتنا
* * *
سألتك بى كبيداتن ودعواتنا
شليل وين راح؟؟
يكون ضل الخريف فاتنا
شليل وين راح؟؟
وزى برق السماك الجابها دغشية
وزى زغرودة البطن الكبارية
مرق من شامة القمره
ومقدم بالعديل يبرا
تعالوا أبشروا آجنيات
شليل ماراح شليل ما فات
شليل عند المسورو حرق
بقالو حصاد
شليل فوق التقانت قام خدار وبلاد
شليل مسدار شليل مشوار
شليل أرضنا يا جنيات
شليل قايم نصاصى الليل
يتمتم ليلو وردية
حرازنا شليل شليلنا دليب
شليلنا دليل على البلدات
بعد درب التبلدية
شليل ما راح شليل ما فات
شليلنا ونحنا همباتة ومهاجرية
مزارع بات على عشقين
تراب بلدو وسماح فوق بت مزارعية


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



اشعار محمد طه القدال

إصـطفيتك أغـلى سـيرة
ولما جيت أرتاح تحت لونك
لـقيتك شاربة مني وشاردة
فــي جــواي مـسيرة
**
وأرتـجيتك بـين مسامعك
طـرفك الـقرب مـلامحك
والـمكان ضـل الـضفيرة
وأرتـجيتك قـول يـشيل
سـاسوية الـكلمة الاسيرة
**
وارتـجيتك فـي وقـوفنا
مـتـين سـحاباتك تـجينا
تـروي شوق بذرة حروفنا
تـرقص الـوردة وتـفرهد
تـهدي لـلأنسام عـبيرها



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



اشعار محمد طه القدال

بـتحمل صعاب السكة شان اصلك
وبتحمل عشان عارف جذور اصلك
مــا بـشكي الـوجع لـي زول
بـعـد حــد الـصـبر يـفتر
أسـيـبك لا ..لا مــا مـعقول
عــهـودك ديــمـة بـتـذكر
تـزيـد الالـفـة بـينا تـطول
نــلـم أشـواقـنـا نـتـصبر
بـالـحـنية نــروي شـتـول
بـتـكبر كــل يــوم اكـتـر
ظـروفـنا الـقاسية مـا بـتدوم
مـصـيـر الـدنـيـا تـتـغير
نـبـوح بــي سـرنا الـمكتوم
شــمـوع آمـالـنـا تـتـنور
تـغـرق فــي صـفاكي تـدور
يـفـوح هـمس الـنسيم يـنشر
ومـــا بـنـعاتب الـمـقدور
لــو كـتـب الـزمن سـطّر.



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



اشعار محمد طه القدال

لما رأيتك
أشرقت آفاق روحي
و احتفى الزمن المقدس
بابتسامتك النقية
و الصفاء
أواه يا نجماً أطل
على السماء
يا كوكب السحر المسافر
في ضفاف المشرقين
أنت التي علّمت
نبض الزهر معنى
أن ينام على اليدين
أنت التي في الأرض
ضاءت بابتسامتك الحياة
أنت التي نضرت
حقل الشوق
أشعلت المداخل في رباه
البحر نحوك قد مضى
كالظامئ امتدت يداه
كي يحتويك فتنتشي عيناه
ترتشف الشفاه
منك الرحيق
ومنك شلال المياه



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





من اشعار محمد طه القدال

كلام الرتينة بت سالم وليد عتمان في حنة علي الشاشوق (قصيدة شعبية للقدال)

بنية.....
بنية لسالم وليد عتمان
وصلاة الزين
سموها الرتينة
أمها بت علي الخمجان
خريف الرازه عزينه

كبار الحلة آباته
بكار الحلة أماته
تمرق زينه
تبرق زينه
تمشي تهاتي وزينه

بلا الربعة التحجل
وشاكية للوديان كتافه
وفوق الجيّد علي ضهر البوادي
تغني ماخاتية الزرافه

سلامها ضنين
بسيمها الودعه
ألا تزيد لطافه
ملامها رصين
مقدم زوكها قبال الحصافه
كلامها حنين
كلامها يطمن الهمباتي
والمجلوبة متعارض كتافه

وقاريه وكاتبه تحمد سيدها
ماخده علي البنيات الشرافه
كذا البريبه
تبرد عيني
لا تغشاها لا أحضر نشافه

وكان في الحلة يوم
حنة علي الشاشوق
مشينا نقدم البنوت
علي ضو الرتاين
عيونهن هارجه
تنبح في الفجر
والليل قريب
واقف يعاين
خدودهن جاهره
زي جهر الكهارب الفي المدينه

وكان الليل
ومافي الحلة ...
من الحفله ألا صداها

كان زغروده
كان غنّاي
رقيص الشامه بت حمدين
وعرضة حامد العولاق
وخت الحنه ليات من حضور
ضفرين...
ونمات العديل والزين
وشنق ود سعد طاقيتو
شان في الحلة ساوو كنتين
وشكلة عامر المسكين
وعيط ودمجمر زين
عشان الزينة رقصت زين
وفي الشعقيبه..
كان بازمالو شباليين

وسكرة وين ؟
وسهرة وين ؟
وبهرة وين ؟
وجهرة وين ؟

أقول آبنيه
ليش ماتهمي
ليش ماتهمي فوق زولاً
مشلهت فوق دريبك
لا النفس مجبود
ولا لحق الغزاله

وقفت ...
وانبهر رماشه
جدعت بالبسم رشاشه
قالت...
والعيون ضحّاكه
في ضو الرتين بشاشه
آ المهجوم....
أهجمك الله
كان داير تسيلي الخلعه

عاد من حيني
جاتني الحاله
قتلها لا لا
وحات النعمه آبنيه
البريد في الريده مابخبر فساله

حدرت باسمه
قتلها....
عايني تسلم عينك
إلا حقيقة مو ساهل كتاله

ندهت ناضره
حالفابو الصباح الباش
يلون في المشارق
وتلين الجايه
من تالانا تاله
وحات أمي
البعزها زي تراب حلتنا
أبقى حداك آالمريود
وأقول لاهلنا
ناس قدام
وفي ها الحاله
مو شيني القواله
وآسأل القمره في شأنك
واقولها هيله يا القمره
وتاني وهيله يا القمره
وتالته وهيله يا القمره
دحين ساكن وريشات القليب
في الحله مو رشه المقاله
وحات الفرحة في ها الليل
بشوفك فيكا عز ابواتي
وضرعاتك خدر ياالباهي
وما دايرا لي غيرك كفاله

وجاتني النهمه
قتلها أقيفي آ المريوده
عايز ارمي لي مرباعين
وتبقى حمالتي عند سيد الحماله

قالت والفجر في خديدها
آ الممسوخ
حدانا العين
بعدما تسدر الضحويه
خت الفاس علي كتفك
وبوح غادي بوح غادي
نم فوق البعجبك ...زين؟

قتلها زين
وداك الحين
بشوفك يا الرتينه
مع الشمش بتلالي
مناك للسحاب
الكابي فوق حلتنا
كان سابل ضلاله
بشوفك فوق عوينات الصبيّن
العشق لطف ضياهم
والنهار وصف خطاهم
والصبر زارعينو
فوق ضهر البوادر
فوق كتافين السقاله
بريد ريدك كفاح اهلي
وأريد ريدك سماح أهلي
أريد مهواك
أريد انسانك الجواك
وأريدك تاني
زي آخر الحتاله
وأدوبي لك
وأشيلك غنوة للسمحات
وأنمك في تراتيلي
وكل ما العتمة تنزل سابله
انسى عناي
واتاوق لقناديلك
وأشد حيلي
وأدوبي لك
وإذا مغنّاي يبرد في الحشا صدرك
ويرجع لي تهاليلي
بدّوبي لك
ولو الشوق
عرف بكاك اطري غناي
عليك العزة آ المريوده
أدوبيلك


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



من اشعار محمد طه القدال

أمونة


محمد طه القدال


ما ضهبت اقول لقيتك
وانتى فى كل الخواتم والمياتم
والنجيمات والعواتم
ما حزنت اقول بكيتك
نحن فى حزن المخاليق
والمغنين المطاليق
الفرح جاييك وعد
غنوة اولاد التحاريك
السعد ولا البعد
البعد ولا السعد
كنتى فى ليل الخوابى
تهاتى بينات الطوابى
تحاكى جقليب السعى
الجنيات خلو حجرك ريح يفوفى
وعين مزرزرة من شقى الفرح المرابى
ومنية الوعد الدعى
يا ديارى الوين ....أنى
تور عفين الشين .....أنى
ما اضينة وزين انى
تور عفين الشين انى
وانت فى شوفك تخاتل رفة الطير والحفيف
وانت فى خوفك تكاتل عينة الجلبت خريف
وانت فى لالوبة مصلبة البنيات
النسيمات الهفيف
وانت فى لالوبة مشنقة الوليدات
ناس نجومى ومحبس النفس الرهيف
بطنك كرشت غى البنات نافى
دقنك حمست جلدك خرش مافى
وكت الوهم نافيت .. صدق الوعد جافى
وكت العلم جافيت .. مر الصدق وافى
وكنا بنشيل الغباين والاناشيد
جهدية الاورطية
جهدية الحلبونا
شدو جمالم جونا
حلبنا ليهم سمسم
والسمسم ما كفاهم
جلبنالهم سعية
وجينا للبقعة ام قبايل
سيل من الوادى الكبير
الكفيف شايل الكسيح
يا عيون ود الضكير
واحدة من توشكى
تقلع
تانى تقلع فى المطامير
يا جبة الدرويش
البابا بسل العيش الله بسلا
والبابا خدمة الديش الله بسلا
البابا القول بى شويش
يا عيون ود الضكير
عماك فى حقك ديه
لى زمنا مو جهدية
جهدية الاورطية
جهدية الحلبونا
شدو جمالم جونا
وحلبنا ليهم سمسم
والسمسم ما كفاهم
جلبنالهم سعية
يا عيونى شن بتشوفى
ويا امونة شن بتشوقى
شدرا تال اليمامة
ولا الصقر الحمامة
ولا البطن التفوفى
يا امونة شن بتشوفى
ويا عيونى شن بتشوفى
جهدية وسيف وراية
تبروقة وخيل وشاية
اذان بالجوع اذن لى
ام خوفك فايت خوفى
يا امونة شن بتشوفى
ويا عيونى شن بتشوفى
تلت التلاتة شلق
تانى التلات محلق
والتالت جا يبشرنى
سرقوهو الدايرين حتوفى
يا امونة شن بتشوفى
ويا عيونى شن بتشوفى
شايفة الدموم واللمة
بين الدقون والعمة
ولانى فوق معلق
صقر الحدى مندوفى
يا عيونى شن بتشوفى
ويا امونة شن بتشوفى


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




من اشعار محمد طه القدال

سمحة وسمرية
محبوبتى ولفتاتا غزالة
خضرة ومسقية
وجنب النيل مشتولة النالة
بهواك يا بنيـّـة كتبتو قصيد
وبقولو مقالة
بتفتحى فيـّـا معانى غناى
تديلا مجالا
*****
زهرة وبرية
بشوق الأرض عيونا كُحالة
تريانة ندية
بعرق الناس
والناس فى بالا
يا خوفا علىّ عقل وثبات
ماها الولوالة
*****
من فرحى البيا
قلعت الخوف وكستنى بسالة
قت ليها النية متين نتلم
والحال بطالة
قالت لى غنية وإنت معاى
مستورة الحالة
بت سودانية
محبوبتى ولفتاتا غزالة


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




من اشعار محمد طه القدال

خمســـــين سنة


لأرض الجزيرة أم دوح عندما ضربتها السيول والأمطار


محمد طه القدال


خمسين سنة
وآيدنا في طول مدّهن
لا فترنا من مد اليدين
لا صبنة جاتك يا رحم

يا يمه عرسك
كان دلاليك الهنا
ويا يمه عرسك
كان قبل كمين سنه
وأمس القريب
قتيلي جاييني الوحم

ربيتي كم ؟
اسبيتي كم ؟
عمرتي في ها الأرض كم ؟

رحطك قطيع
يا يمة من مجدة جناك
في الأرض
في الزمن الزمان
والليلة يا دوبك بكر

شلخة نصيبك يا أم عرض
مكتوب تصيبك
لابدق فوقك نحاسي
لا دمع برميهو شانك
ما بقوقيلك شكر
ومترجيك
إجيلي فداك في دمي
ومترجيك
غنايا على الأرض والفاس وبت أمي

إذا ما البيت لبخ جالوص
ومزبل للخريف عِمة
وكان جواهو محبوبين
وهبابين
وخمسة عيال وسحارة
وكان في البيت
عقاب معزاية للشفع
وكان الدنيا يا الضلمه
وكان القبله جهاره
وكانت الغيمه دراره

سبلوقاتنا ما صبّن
سباليق جارنا سوّن جو
ودميع السحاب نوّح
ويا معز اللبن دغّن
ويا البقر الطلق بوّح
جفل في الزيفة ديك روّح
ويا الكلاب يسوّن هو
وقام حتى الجداد كيّك
ويا مرق السنط سيّك
وتمسع وردلوب حيطة
ويا ابو مروه يا ابو مروه
بيت حاجة أم خريف دركان
تجيك من الفريق عيطة

وتقرأ أم احمد البسم الله
في الأولاد
وتقرأ أم أحمد البسم الله
في الأولاد


قت لك أمرقي آبنيه
هي طينتاً في التراب
نية
قت لك أمرقي
فرشاً أطير
هو شن هباب
وشن كراب
وتسمع وردولب
يا المعزة وقعت ناشفة
بين الشعبتين والباب

وقام أحمد يحاوط البيت
أسرع يابا
شقوق أمسيسي والفاره
يا الحوش الصبح ميضه
وبدور مركب
دحين إبقى البلد خرّف
دحين إبقى السرف نعمة
أقيدي اللمبة
يم أحمد
بدور أضهب
وكسر الحوش
عشان الساس
وسيلي علي الحدب
مصرف

وكان اب أحمد المهجوم
بقرأ الفاتحة في سرو
بقرأ الفاتحة في سرو
بقول الجات علي مالك
مليحا جات
علي مالك
تعال آجني
وكنكش فوق كتف خيك
عاد لا حولة ولا قوة
جانا غضب
ومويه ركب
وداك الحسرة
كان الحلّة شربت تب
وكان اتشتت الرصاص
وكان الساس
حتل وانماص
حتل وانماص

دميع السما
ودميع الجهال واحد
دميع الجهال في الضلمة
كان مالح
وكان القبلة في عينينا
دواره
وأصبح بيتنا لتولاتنا كفاره

وشن بتقولي في القبلي
المدمع فوق عشم عشمان
خلاف دمع العشم مو نوح
وشن بقولي في الصباحي
والضهراوي والطوفان
وصدرك آمان
وحجرك لجناكي ضمان
باقية علي المدائن
مونة وقدح ضيفان
وباقية علي الجناين
دوح
ومو غيّرك سفينة نوح
ولا خابت عليك مسرتنا
نتراجك
بالدلوكة نترجاك
بالسلوكة نترجاك
تقوم يا بيتنا
بيت الطين
شراية يوم
لتيبة يوم
ولبنايتاً تخدر
في مسورنا الجاي
ولبنايتاً تخدر
في مسورنا الجاي


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




من اشعار محمد طه القدال

نحن اهل الفرحه جينا
لاالمدامع وقفتنا ولاالحكايات الحزينه
لما درب الرايحه جابنا جابنا في هادى المدينه
ياولدى الدروب شقاقا بحر التيه
ليك درب ولا دربين مساك الدروب ضهاب
ليك قلب ولا بالين وسواى القلوب كضاب
ليك ضهر ولاسرجين ركاب السروج وقاع
شق ياولدى بحر التيه بتتدردر وتتودر
ولامن يوم علي تايتنا ديك ترسي
نعزك بالقبيل داخرنو ليك
الشوق بحر ياولدى بحراً تيه
قت ليك العليك ادرابو لا تنغش ولا ترضابو لاتنغش
في الزمن الزمين والكي يسوهو خلاف عشان الني
عليك الدور وتصريف الليالي بدور تشيل ما شلنا من الهم
ولا من دمعه ترمي الدمعه فوق دربك
روح يابا .. وابق قفاك لاتعاين ولاتعاين علي موطاك
ولا تندم علي خطوا تملي مشيتو لى قدام
وابقي العاتي زى سنطتنا زى صبرا نلوك فوق مرو زى الزاد
لاشيتاً نزل في الجوف ولابرجع ولا بنزاد
واركز للبجيبها الريح تقيف انت ويشيلها الريح
وابقي العاتي والدرب الوراك مسدود و شيل شيلتك
بقيت للنص لاحلما بجيب البر ولا حدود
وانبليتا اختا الرمله ما تقع البكان الهش
هي الممطوره مابتبالي من الرش
النعمه بتعرف عاطيها والجمره بتحرق واطيها
بالكيله عطانا و ما لقينا فوق جمر خطانا وما لقينا
يوم الوعد... ياحليوه فيك الدنيا ما كانت شروق
الا الارض متكشفه متبلمه نعمنو من خير الخريف
لافحالها شال منطرحه خضرا وفرحه دوب تتشابي لي عين الشمس
من بت حليوه النفس بيضا كذا الحليب
والروح مشحتفه في البلود الفيها ريحتك
للبعود من فزعة الغربة البساسق فوقا
موراجع ولا بالحيل قريب
الروح مشحتفه في الحبيب القلب بكر الدنيا ما شافت جديدو
ولا الحزن دقالو باب
وشفتي كيف يوم الوعد كيفنو مترامي الغمام
والقمري زغرد للبلوم النسمه هبت مرتين
يا حليوه يوم دقيت بارضك فاس خصيب والتانيه في
يوم الوعد والايد تسالم في الايدين
والام تقالد فوق جناها تشمو زين
وحليوه صاحيه حليوة ضاحيه كذا النسيم
والدنيا غيم وحليوة جد جد ياولد قول للبلد
قايل غناوي الحزن ليش شايل مساديرك مجامر دمع ليش
ليش يا بلد والناس تريد والدنيا كل ما نريد تزيد
تملا الايدين تفرح تهش
لو صحيح غنينا بالدمعه الحميمه ولو دموع الفرحه ما لاقت غنانا
بكره نرجع تاني للكلمه الرحيمه شان هنانا شان منانا
شان عيون اطفالنا ما تضوق الهزيمه


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




من اشعار محمد طه القدال

صابرين
ياحزن الغنا
صابرين
من بعد الضنا
صابرين
على وعد المنى
*****
برجاك
يا وكت الحبيبة
وبلقاك
فى الفرحة القريبة
وبشراك
يا أم السنا
*****
لا ليل ولا حزن طايل
لا صد ولا دمع سايل
لا هم جاك يا أم نفايل
والنيل فاض وإنحنى
نيلين
وحلمك أنا
فرعين شايلين جنا
*****
عشرات حبابك
سلامات
شايل سحابك
سلامات
والقبلى شابك
سلامات
خيلك سنابك
سلامات
وهواك هنا
صبـّين
عاشقين ترابك
سلامات


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





من اشعار محمد طه القدال

رجعلك قليبى المهضلم
يراجع صنوف الغناوى .. العصيـّة
جا راجع معاك الكلام
القبيل إستبان
الكلام المبهرج مخاوى
الكلام المزيف
ولا فيهوغيرإحتلام وإنفصام
تموت الحروف .. يوم تقوم القصائد
مقام الطبول والبخور
**********
بشوفك جرايد شواكر حوامِد
ولا هامِّى فيها
عليها المصايب .. تمام التمام
مغايص بتفرم حشاهـا
وغباين بتنفُخ بطون
البسفـّوا التراب
وحايح لهيب البتلـفح ..
تلهْـلِبْ .. وتشوى الجلود
أتف القصايد إذا ما القصايد
دايرة ليكى البكـا
البصاحب رِضا السرِّدار
وأتف القصايد ..
إذا ما القصايد بتنزل مريدة
وتسبِّح بحمد الذى إبتلاكى
وهدانى الودار
***********
طريتك وأنا الكنت قايل
خيالك معشعش جوايـا
سكنتك .. وما لاقى فِجـّة
أخيرلِكْ أقول البحرِّق حشايا
أخيرلِكْ أفضفِضْ جراب الخبايا
أقول الكلام البفكك سوارك
يوقـِّف جدارك .. ويرفع عضايا
تضيع الرموز التغطى الكلام
أقول السكاكر .. أبتنى
ورمتنى .. وكفانا
أقول العساكر .. تبارِى الكبارى
تفتش قلوب الجُهال
الشلوخهُمْ .. هويّة
وأغنى الزيود .. والكنانة
كِضِبْ..
أقول البنات البفتْحَـنْ صِدورْهِن
يقالدن رشاشك .. ويخلّنْ حبيبهِنْ
كِضِبْ
عريب الجزيرة الببيعو الزيوت
ما شروك و وفروك وختوك تراب
عقال الجزيرة المدلدل هدومهم
قرب ود رباعة المودك بطونهم
مراتب قطن حراير جلودهم
بنات مونتكارلو الجواهل جوالف
ضنب عمو سام
************
مُراحك .. يعشِّى .. ويفشِّى
خدارك مرطـِّب يندِّى الضَهَارِى
تُرابَك مبوسِبْ .. يقوِّم دُخُن ..
لو زرعتوا الحجارة
وِلادكْ .. بِلادك .. كروها السَّحالى
تسفِّر سعيتك ..
تقنِّب تبارى الجداد العُقالى
تجوع يا البشدِّر خريفك
سواقى البطانة
ويمطِّر رزازك .. عزازالحصاية
وقموحك سنابل مُشاط كردفانى
ابيت الكلام المقتقت وفاضى وخمج
*********************
وِلادك قُصادك .. شُعاع التحايا
يضووا الشقوق التَّلِم الدوابى
ويورّوا الدروب لى القلوبهم عمايا
عرقهم حُبالك .. وصوتهم مشانق
تلم الدقون الكبيرة
وتحدِّر فِقَرْ .. سمنتها اليالى الضليمة
بتهدر حرايق .. وتحمى
البياكلوا المطايب
وتسجن بطون الجياع .. العرايا
وشوشهُم سُمُر .. حَر أباطك
صفوفهُم مقامك .. وحِلمك حِلِمهُم
رغيفة ..وكرامة .. وسلامة
مصانع بتحرق قبُل تبدا فيها
مزارع بتـيـبس
ونيلـك ممدَّد جنازة
وعقـيدك .. وسِيدك ..
بيكتب ويمحى وتبقّ المحاية
ابيت الكلام المقتقت
وفاضى وخمج



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®







من اشعار محمد طه القدال

بعد الرحيل برجاك فوق هدب السنين

برجاك عيد فجر الليالي الفيها بحلم بيك يقين

عشمان أعيش لامن أشوفك في الدروب

شمعة فرح بسمة للعمر الحــزين

****
بعدك رحل فرح الفواصــل

وفي الحروف ذغرد جـــرح

ذان الجبـــين

وارتجف قلم الشعـــر

فوق الورق فجر اساي

صرخة حـــرف

حسرة وأنيـــن

****
والرحيق هجر البنفسج

والفراش بكي في إرتحالو

وانسكب عطر الأماني

فوق حقول الاحتمــال

ماتت أنفاس الاغاني

وقالت الفرحة الســلام

وفي العيون الحسرة طافــت

غاب فنار الابتسام

****
مكتوب علي احمل أساي

أرحل أطوف بين الحروف

امسح فرح وأكتب جرح

حافظ هواك رغم الظروف

****
ومهما طال الانتظار

تلقيني واقف منتظر

جوه في نبض الحروف

راجيك لما ترجعي للديار

تهدي للعمر إبتسامه

وليك تتقال القصائد

بيك تتحدد خطاي

وليك تتقال القصائد

بيك تتحدد خطاي


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®