zankalooni
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


منتديات زنكلوني الأدبية ...شعر ..قصص قصيرة...روايات
 
الرئيسيةالرئيسية  البوابةالبوابة  أحدث الصورأحدث الصور  التسجيلالتسجيل  دخولدخول  

 

 هاشم صديق

اذهب الى الأسفل 
كاتب الموضوعرسالة
Admin
Admin
Admin


المساهمات : 35
تاريخ التسجيل : 12/11/2011
العمر : 33

هاشم صديق     Empty
مُساهمةموضوع: هاشم صديق    هاشم صديق     I_icon_minitimeالسبت ديسمبر 10, 2011 7:05 am




قرنتيه قصيده لهاشم صديق

قرنتية



قرنتية .. ما غواصة روسية
قرنتية
لا دبابة برمائية
لا جاسوسة مدسوسة .. لا غواصة روسية
لا جندية في "حركة" .. لا مختلسة مال شركة
لا قصفت حدود "فشَلا"
لا كسرت صريف كسلا
لا معروفة ختمية .
قرنتية
لا صعلوقة لبست "شورت"
لا بتعرف شنو البظبورت
لا محتاجة جنسية .
هي قايلة النيل سقِف بيتها
وقايلة ضِفافو "محمية" .
جات منسابة عز الصيف ..
قايلة الناس بِكِرمو الضيف ..
وقايلة النيل أمان والقيف
وقايلة "الحاضرة" عصرية
قرنتية ..
جات بصغارها دايرة الخير
لا شافت يٍفَط تحذير
لا نزحت تكوس توزير
لا جاطت حركة السير
لا دارت وسام تقدير
لا مستلفة عشرين وش
ولا بتعرف تعيش بالغش
كان محتاجة بس للقش
وجات أحلامها دوغرية
قرنتية
لا بلعت عديل السوق
لا نضمت بدون طايوق
لا كنزت دهب أو ماس
لا ظلمت بدون إحساس
لا عصرت شباب الناس
لا كتمت على الأنفاس
لا قطعت عشم بي فاس
لا داستنا زندية
قرنتية
لا دست سلع في الخيش
لا شربت مريسة عيش
لا ضبطوها في التفتيش
لا خانت قسم أو ديش .
لا اجتمعت "بمستر جون"
لا أكلت "مؤنة العون" .
لا سدّت علينا الكون
لا سبت كتاب أو دين
لا سامتنا حمرة عين
ولا باعتنا ضهرية
قرنتية
جات مشتاقة للخرطوم
تزور أحبابها خايفة اللوم .
تصيح وتنادي بالحلقوم :
"جنينة النزهة" وين يا زول .
"جنينة النزهة" وين يا زول .
***
لقت حال الجنينة خلا .
حليل زمنها وحليل أهلها
لا قرنتية .. لا أصلة
لا صوت ككّو .. لا بغلة
لا حلوف .. لا أسداً مهاب بالخوف
لا نمراً يشد للشوف .
لا ضل فيل .. لا تيتل جريهو جميل
ولا غزلان .. ولا طاؤوس يباهي النيل
لا زفة طيور ونعام
لا نمراً دفر قِدّام
كل الشُلّة ياقرنتية غمضة عين
أحالوهم لصالح عام
تقول الدنيا "مهدية"
قرنتية .. ؛
جات زي ضيفة ما غارة .
لا محتاجة لي فيزا .. ولا تصديق على زيارة .
جات والشوق دموع حارة .
تجدد في العيون الشوف .
بين توتي وعلالي أبروف
قايلة الدنيا لسة سلام ما خيم زمان الخوف
لسة هناك ضفاف حرة .
ما مطمورة للمُرّة
قايلة الناس بعزو الضيف
ما بسوقوهو لي حفرة وجوار القيف .
ما بياكلوهو في الصفرة ومصيرو مخيف
قايلة الحاضرة ما غابة .
وقايلة حقوقها محمية
قرنتية ..
لا قدلت في شارع القصر .
لا حامت في وكت الحظر
لا خشت على المأمور .
ولا نطت سلك أو سور
لا دخلت على أمد رمان
ولا كسرت قفل دكان
لا دفرت على التلفاز
ولا عضّت كراع فنان
لا ذاعت بيان للناس
لا احتلت كمان "حيشان"
ولا نصبت شبك للحشّ
جات بصغراها كايسة القش
تلاقي القوت صبح محظور .
وخير البقعة جوه السور
سماحة الدنيا منسية
قرنتية
لا بتعرف عجن أو لخ
وجات أحلامها دوغرية .
عجب .. ساقوها جوه الفخ
عجب .. من طولها وقعت تخ
عجب .. سلخوها صبحية
عجب .. ونحنا بنسلخ الإنسان
كيف ما نغدر الحيوان
عجب .. والدنيا عصرية
قرنتية ..
لا دبابة برمائية
لا جاسوسة مدسوسة
لا غواصة روسية
لا جندية في حركة
لا مختلسة مال شركة
ولا حزبية بعثية
قرنتية !



قصه القصيده (قرنتيه)

قصيده قرنتيه هذه
كتب علما اظن في العام 1999
عندما حضرت قرنتيه من ميها الجنو لتستقر في المنطقه الجنوبيه
لجزيره توتي
وكانت تاكل الاراضي الزراعيه للفلاحين في تلك المنطقه
فقام احدهم بحفر حفره علي الضفه الغربيه للنيل امام حي بيت المال شمال كبري شمبات

فوقعت في الفخ حاول المزارع ورجال الشرطه اخراج القرنتيه ولكن مع الاسف تكسرت اقادمها الخلفيه
فقامو باطلاق الرصاص عليها وقتلوها
المؤسف في الامر ان الضحيه كانت انثي ولها طفل صغير تم اكتشافه بعد اسابيع قليله مهاجر في طريق العوده الي الجنوب وحيدا


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





مسابقة رمضان - هاشم صديق

هنا امدرمان

مسابقة ...تسلية

فى رمضان

الحل ما ساهِل

فَكِّر..وقَدِّر يا انسان

جهِّز ورقة

وشغل عقلك

ورسل لينا الحل من فضلك

أسمع..وافهم

واكتب حَلَّك

...........

مُنَظِّر واهم

جاهِل ولا خِم

كتابتو حروف

من عَهْد الروم

كضاب لو تقرا وتَطْلَع فاهم

هو صحفى ...وزير

ومُحلل ..وكاتب

واكبر لُعَبى ..وعامل راهِب

مرة يِهَنّق..ومره يبرر

لما الوالى العادل يِشَنِّق

فى الجامعة فضايحو

كتاب منشور

عنوانو (غراميات دكتور)

مرات بتفلهم .. ويحلل (مايو)

ويرجع جذور (لعهد الفور).

ومرات يلخمنا بعهد الوفرة

كأنو الشعب الجايع تور


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



اشعار هاشم صديق

ست الشاي أف. بي. آي


الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حجتيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن
-أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر
(بالعرقي) الداشر
والليل مصبوغ
بي رحية (المزة)
...
الرادي يكورك
وسط الحوش
-افغانستان
موت أفغان
-مستر بوش
وخواجة بيصرخ
وصوته مرخرخ
زي (حنكوش)
-القصف يدك
أركان (كابول)
...
ووالدة (صابر)
حاجة (بتول)
مشدوهة تقطع
عيش الفتة
تكب سرحانة
في موية الفول.
-يوماتي عشاهم

(فتة بوش)
والرادي يساسق
بين (بن لادن)
ومستر (بوش)
وصابر يطنطن
-الصاح مقلوع
السيف مرفوع
الكلمة غموض
والمغنى فروع
الدنيا خراب
والأقوى مهاب
والعدل رهاب
...
الليل مشروق
بي فتة فول
وصوت (الحاجة)
الوالدة (بتول)
يناغم صابر
-شنو الإرهاب؟
ويتمتم صابر

قلـ...قلتي
شنو؟
وترد (الحاجة)
-مالك مرعوب؟
تتلفت ليش؟!
تقول مزرور
بي عسكر وديش؟!
سألتك بس
شنو الإرهاب؟!
واتنحنح (صابر)
صنقع ودنقر
حك رويسو
اتمدد وصنقر
وقال للحاجة
-سؤالك يمة
جوابو كتاب
لكن....
لكن يا (حاجة)
زي ما تقولي
طلع ربّاط
في الليل
لي زول
بي سيف مسلول
وشال من جيبو
قروش العيش
وحق الفول
أو زول آمن
يقع في مكيدة
يموت مكتول
وزي تغيان
على الفقران
على المسكين
على الأعزل
على المشلول
...
وتتدقق
غبينة (الحاجة)
زي راجمة
وتصبح ناغمة
-وحسع نان
منو الرباط؟
امريكا؟
(بن لادن)؟
ولا الأفغان؟
من التغيان
منو المسكين؟
من المظلوم
(مستر بوش
ولا فلسطين؟
شنو الـ......
منو الـ....
...
ضحك (صابر)
وحك رويسو
واتنحنح
وقال للحاجة
-يمة اتعشي
أكلي البوش
لو عارف ردود
لي ديل
ما كان الرويس
مدووش
...
سكت صابر
رقد معبور
وصوت الرادي
لا في الدنيا
لسة بيدور
سرح صابر
ودمو يفور
نكش حزنو
وقال لي نفسو
من قلبو
أريت الدنيا
حسه تغور
...
سمع صوت أمو
تاني يلح
-دحين يا وليد
بدور أسأل؟
ويرد صابر وضيق العبرة
طعمو ملح
نعم يمة
قايلك نمتى
وترد الحاجة
أنوم كيفن
وصوت الرادي
في أضني
زي مكنة؟!
بدور أسأل
دحين أمريكا-
ما ياها
العذابا دنا؟؟!
...
ويرد صابر
وضحكو علا
-عذاب أمريكا
ولا هنا؟؟!
عذاب أمريكا
ولا أنا؟
ويصن لحظات
-دحين يمة
-ورمضان جاي
هم أمريكا
ولا اللقمة
والويكة الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حجتيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر...
ترد الحاجة تفتش لكيس
تمباكا
في الكراب
نقول همين
عذاب وعذاب
تخت السفة
وتبرطم
-دحين يا وليد
ده مو الإرهاب؟!!
...
ويصن الليل
ورأس صابر
يدقدق ساي
يشرق جاي
يغرب جاي
- كراتشي
- أباتشي
- أنقرة
- عنقرة
- ربع الويكة
- صوت أمريكا
- جمرة خبيثة
- مكيدة دسيسة
- بي. بي . سي
- أي. أن. تي
- سي. أن. أن
- توني بلير
- كلام الطير
- خبر وحواشي
- إبراهومة
- أموكاشي...
ويقع صابر
في بير النوم
ويشوف روحو
بدل (أمجاد)
ركب بعشوم
وشاف الناس
توسوس ساي
خبر يا هناي
ست الشاي
أف. بي آي
وأحمد بيه
سي . أي. أيه
ووسط الموز
لقينا (كروز)
-برج كلتوم
ملان بحمام
وقع صاروخ
شق حشاهو
سكن جواهو
سوا حطام ويغوص صابر
غرق أكتر
في بير النوم ويشوف الحاجة
امو (بتول)
وسط الزحمة
رافعة أيدها
بي قندول
تكورك وتهتف
- لا أمريكا
- بل فتريته)
(أنحنا الساس)
رافعين رأس
ما ببنتراجع
ما بنتهان
ما بنخاف
الأمريكان
...
ويشوف صابر
بيوت الحلة
تتغامز
وتتريق
على الحاجة
وتتلامز
ووسط اللمة
صوت الحاجة
عالي فصيح
(تشيلو الريح)
...
صوت الرادي
مابي النوم
الموت أخبار
الظلم حصار
الرعب خيار
والليل حزنان
الليل عريان
والقمرة هدوم
الليل مفضوح
والنجم كتوم
الدينا تصن
لقيامة تقوم
صابر مجروح
في نومو
يئن
وفي الرادي تجن
بالتار
(بيق بن)
والنشرة تجيب
أخبار الشوم
كابوس صابر
قفة خضار
سوت جنحين
طارت لي فوق
والفاقة مطار
...
كابوس صابر
يعلم أيه والدنيا مصالح
وسي. آي. أيه
...
كابوس صابر
الناس بتوسوس
وتنضم ساس
ست الشاي
أف بي آي
...



الدنيا مغازي
يموت الحب
ترمي أخوك
في بطن الجب
وتترتر غادي
تناصر الغازي
...
كابوس صابر
الكلمة ضحية
إرهاب مشروع
وإرهاب وحشية
ضحايا غبش
وضحايا غنية
...
كابوس صابر
الناس (بالقرجة)
تقيف للفرجة
تغير لونها
ميتين درجة
...
كابوس صابر
هم الويكة
والفتريتة
ونار أحزانو
ونار أمريكا
...
كابوس صابر
الصاح مقلوع
السيف مرفوع
الكلمة غموض
والمعنى فروع
الدنيا خراب
والأقوى مهاب
والعدل رهاب
الرادي يلغلغ
وسط الحوش
بين (بن لادن)
و(عمر الملا)
ومستر بوش
- أفغانستان
- موت أفغان
- القايمة تطول
- عراق.. سوريا
- جنوب لبنان
- وما معروف
- تاني كمان!
تجي الحملة
عقاب جملة
(على الإرهاب)
...
على الإنسان؟!
القصف يدك
أركان كابول
ووالدة (صابر)
حاجة (بتول)
حلمانة تقطع
عيش الفتة
تكب سرحانة
في موية الفول
يوماتي عشاهم
فتة (بوش)
والرادي يساسق
بين (بن لادن)
ومستر (بوش)
...
صوت الرادي
مابي النوم
والليل حيران
الليل حزنان
الليل عريان
والقمرة هدوم
الليل مفضوح
والنجم كتوم
...
كابوس صابر
قفة خضار
سوت جنحين
طارت لي فوق
والدنيا مطار
...
كابوس صابر
صوت مبلوع
حق مقلوع
والموت بالجوع كابوس صابر
يعلم أيه
والدنيا مصالح
وسي. آي. أيه
...
كابوس صابر
الناس بتوسوس
وتنضم ساي
ست الشاي
أف. بي. آي


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®



اشعار هاشم صديق

عَزم الغَلَابة


مسكين أنا

ومسكين أبوى

مسكينه أمى..وبرضه أختى

كمان أخوى

لكن - ورغمَك يا شَقَا-

بَرضُه راكزين زى بَلد

الليل سَرَحَ فيها ومشَىَ

وسَاوم عيونها وحَنَّسَها

ولا اتبَدَلت..لا استسلمت

مسكين أبوى

ضامِر مِتِل عوداً نِشِف

ومسكين أبُوه

السَّلَّ سيفو على المدافع

وصاغ صباح مليون حَرِف

ومسكينة أمى

الما غِشَت درب الكتابة

لكنها

ساعة الحريق الشال عُمُر

ناساً عُزاز نصروا الغلابه

عِرفت تَخُط حرفين كبار

رَسِمُهم حِلاَ

ولاَ مِن لَمَع لون الحِبِر

كل البلد صِبحَت دروب

مكتوبه لا




تَعَب حُرُوفها

ضِحكت عيونها

كلام أكيد قالوه غيرى

ودايِر اقول ابيات جديده.

وشان أطوّع للحروف

العارفها مرات عنيده

ساهرت زى قطرة مَطَر

فىجناح سحابة.

وقلت يا أقدر أقول أوصافى فيها

او أصوم من الكتابة.



حاولت أرسُم ضَحْحَتَها

كل ما أحَنِّس فى الحروف

ألأقاها تابى

حاولت تانِى

بديت أعيد رسم الحروف

إصرارى!؟..لا لا

ريدى ليها الطاغى جابها

وفرحت لاَ مِن دمعة رَقَشَت

وخُفتَ تنزل

وللخطوط تَمسَح تَبَدل

وَقَفتَ حيلى بعيد مشيت

قَبَّلتَ تانى رجعت جيت.

زِدت الخطوط عايَنْت فيَها

لقيت نجم شَعّ وْحَضَن

وردة بَنَفسج جوّه غابة.

وكلمة احبك فى الفروع

مكتوبة بى صدق الغلابة.

وكوخ مَحَكّر فى القمر

قلبى البِرِيد لى بابه شابا

وفكرت تلت الليل أفسّر

وين جمال ضحكة عيونها

وين؟وين؟ وهل..؟

وهل أحرف كلامى الفيها دونها؟

وحاولت تانى

ومن جديد سِخَت الحروف

زدت الخطوط اكتر كمان

بَسَمت عيون السمحه من وسط السطور

وشوَيّه من الدايروبان.

وبديت أزيد... ومرات اعدِّل

ولما ألقىَ وَصِف جديد

أفرح واقيف فى الساحه أقدِل

وفى النهاية لقيت عيونها.

والبَرِيق الزى شموس حَاضِن سنونها.

والخدود والجيد... وخصلاتها

البِزِيد غزل النسايم فى جِنونها

كلهن ضاحكين بتَاوقوا من القصيدة

إلإ آه أنا من حروفى الفيها عاجزة

كل الكتبتُه محال يكون أبيات جديدة

محال يكون أبيات جديدة

يناير 1974م


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





اشعار هاشم صديق

كلام للحلوة


لما شُفتِك

ليلِى ضَّو وبَقَّ نور

ونرجس الجنه المفرهد

رفّ بى جِنحَات عطور

وغنَّى فارسِك

خَتَّ صورتِك فى الإطار

فى الليالى نَجِم يِلالى

ونسمه فى وهج النهار

وقال فى وَصفِك لما بنتى

أحلى مِنِّك . برضُه إنتِى

وما فى غيرِك زول معانا

حتى كان يا سمحه غِبتى



ومَرّه جَالَن الف خَاطِر

بى عيون عقلى المسَاهر

فجأه عينيكِ الحبيبه

!قالو سارح وين مِسَافِر؟

عِشتَ قولِن شيل وصَفقَه

وقُلت بس يا ريتنى القى

همسه فى حُلم الأميره

أو سَبَايب فى الضفيرة

أو عِقيد فى تِبرِ جيدها

أو قليب فى راحة ايدها

يا زمان أسمعنى واكتب:

البَرِيدها وريدها سِيدى

وريدِى سِيدَها

الزمان لوحتى بالغ

ما أظِن فى زول يعيدها.

يا حَلاتِك

مره همسه .. ومره نَسمَهومره هَلّت نَجْمه غابت

ومره صَحْوَة غمزه نامت

ومره ضحكه تَرَضِّى شوقنا

ومره كلمه تضِّوى فوقنا

ولمّا نسرح فيكِ قَادلَه

زى ملايكه علينا نازله

بَس نغنى:

يا حلاتكُم يا أهَلنَا

يا مصابيحنا ونجومنا

الضّاويَه فى واحات زَمَنَّا

1971



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





اشعار هاشم صديق

زول بحبـــك


زول بحبك

وماكا خابرو.

ياما لاقيتو وبسالمك

وداسِّي منك

حال دواخلو.

جُوّه فيها

الموج يدافر

وانت يا محبوبو

فاكر

انو رايق

وقلبو شاغر.

أصلو زول

بِتْدَّس ملامحو.

يَا ما لاقيتو

وبصافحك

موت بجيك

وما كا عارفو.



زول بحبك

وما كا شايف

يا ما سالَم

وصوتو غالَب

رجفه

فس همس الشفايف.

مره شَدّ

على ايديكا

وقلبو جنّح

ورقّ ليكا

ركّ

في شُفة عينيكا

وقرّب يشرح

جنو بيكا.

إلا حلّق

في المخاوف

أصلو جرّب

وحلمو نازف

موت بريدك

وما كا عارف.



زول بحبك

وفيهو ساكن

يا ما دسّاكْ

في ملامحو

وفيها ليكْ

سوَّر مساكن.

كم لقاك

حياك وصبَّح.

وفي ابتسامتك

قرَّب يسرح

كان مناهو

يقيف ويشْرح

إلا خاف

من "بس" و"لكن"

وينكسر خاتر

مشاعرو

ويبقى صبح الدنيا

داكن.

أصلو زول

ممكون وصابر

جوه فيهو

الموج يدافر

وبره

في قسمات وجيهو

تلقى

موج البحرِ ساكن.



زول بحبك

وما كا خابرو.

يا ما لا قاكا

وبسالمك

وداسِّي منك

حال دواخلو.



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





اشعار هاشم صديق

انا لا وارغو لا افياني


(1)
التكوين

إسمي خميس ود كوة العاتي
كان عجلاتي
وأمي مهيرة وأبوها بشارة
كان ساعاتي
أبوي من بارا
وأمي إتولدت في حلة غميسة
ما بتنشاف في أي خريطة
بأي طريقة بأي شطارة
كان بي عين أو نضارة
أمي وأبوي صدفة اتلاقو
في الدنيا الشاسعة والرحمة الواسعة
في قطر الهم الدرجة الرابعة
كانو عوايل في السفر الصدفة
ملح وملاح ونسة وعرفة
تسالي وترمس وقهوة بقرفة
وفي الونسة السمحة في قطر الزحمة
قلب الوالد حن ورف
وقلب الوالدة اتخج وخف
بعد شهرين صبحو اتنين
زوجين طيبين اتلمو في اسرة
في بيت (البقعة) وسط ( العرضة)


أبوي فقران لكن بدبارة
مهر الوالدة كان سحارة
تلاتة جنيه.. سعفة ووردة
وفركة وفردة
تبروقة ومصحف .. وبمبر ومبخر
تربيزة يتيمة .. نص دسته كبابي
كفتيرة قديمة .. وكم هبابي
جابونا تلاتة.. بتين ووليد
ربونا بكسرة.. كسونا السترة
شربنا اللبن الصافي الاصلي
ما اتمطقنا اللبن البدرة
شبينا كبرنا.. فهمنا نطقنا
وكسبنا القدرة
وأنا كنت مقرم .. وود تفتيحة
والدنيا دي كانت طيبة فسيحة
سينما (برمبل).. باسطة (بيَن)
الترماج
حبوبة عجوبة
والنفاج
قصبة سكر وعنكوليب
نبلة قوية وقلوبية.. شرك الطير
رحلة عيد لجزيرة توتي .. أو الباقير
شدر كافوري سواقي الحاج
جنينة النزهة..
زنكي اللحمة ..السوق الزحمة
وقهوة نوري
والدافوري قيامة عجاج

أنا كنت حريف والكورة شراب
أحاور نملة في جحر الضب
وأبهدل أجندل أشطر باك
أو هباك
أفرشو رررب
روضت الكورة
بدل مأسورها بقت مأسورتي
المجنونة بت الكلب
وأترقيت للتيم الاول
وكبرت بقيت مفتل شاب
اتنورت عن الأوطان
وإتفتحت علي الاحزاب
العرضة جنوب .. العرضة شمال
خور ابو عنجة .. بيت المال
شارع الطابية.. تيم الطاغية
كار المافيا .. جنينة سيدي
سور القبة ..ضرايح بحري
شرايف بري
رافع الراية
تيم القعدة والانداية
ناس شاشاما.. نادي شليل
الحولية .. دق النوبة
في حمد النيل
الشامراب .. نادي الكاب
....... والخ .. والخ
بخا بخ في العجن اللخ

ولأني حريف وود لعاب
سكنتني عيون من باب لي باب
إتسجلت في تيم مغمور
مرقت سريع لي تيم مشهور
والبلد أتيام والناس أقسام
شارع خاص .. شارع عام
أتيام فارعين .. أتيام أقزام
أحزاب فارغين .. أحزاب أعلام
دروب وحروب .. صدام وكلام
وأنا كنت خميس ود كوة العاتي
بقيت موضوع تصفيق وشيوع
مرات محبوب أحس بسلام
ومرات أتخاف .. تقول بعاتي
مرات إخلاص لشعار التيم
مرات معدود في الحال متواطي


(2)
الوعي

من تيم الشوف الضيق ضقت
إتأملت الحال المايل
وشفت الناس في خصام وقبايل
فكيت تسجيلي بايدي وعقلي
وأتسجلت في تيم الشعب الثوري الغالي
وأنا أصلي مصحصح وود تفتيحة
ولاعب فقري
مرقت سريع من ضيق الحارة
للميدان الواسع دوغري
أنا لا وارغو ولا إفياني
لا ود طمبل لا مساوي
إتسجلت بحق طعمية
شراب مقدود ..وكدارة هدية .. وكيس تمباك
وإتفننت أكون رأس حربة
وإتجننت عديل في المحور
وإتقطعت أكون مساك
إتراقبت كتير بالصف
وإتكعبلت كتير من خلف
ولأني خميس ود كوة العاتي
أقع وأقوم كمكان سداري
تقول عجلاتي


وقعت كتير لكني وقفت
حاورت دفرت بعزم الشعب
وصلت المرمي
كم سددت ..كم سجلت.. كم دافعت
كم مررت .. كم قومت نفس عراضة
مع اني مراقب ديمة بلاعب
لاصق فيني كأنو قرادة
ومرات ممسوك بي زول عتالي
جابوهو عشاني خصوص من مالي
شعارو الغالي لا باص لا بصة
يتابع يراقب تقول مرسال من جهة مختصة
لكني طرحتو .. جمعتو .. قسمتو
جدعتو بعيد في برة الخط
إتمدد يقنت زي ضكر البط


ولأنو الكورة والدنيا الصعبة
بحر ممدود لا حد لا شط
إتعذبت في درب الواقع
أكتر وأكتر
التحكيم الفاشل ياما
شهر في وشي الكرت الاصفر
ومرة الاحمر
وجرايد النقة كانت أخطر
ألف إشاعة وكم شماعة
سموم وحراب .. دمار وخراب
كم سووني بعت وخنت
أو ساومت وإتقاعست
بعت قضية قبضت رهاب
وإتهافت عديل لي والي
أو دقيت في السر لي باب
وإتوسلت عيون أرباب
مع إني خميس ود كوة العاتي
ود تفتيحة .. مصحصح وفقري
مرقت عديل من باب الحارة الضيق ضايق
للميدان الواسع دوغري
فكيت تسجيلي بإيدي وعقلي
وإتسجلت في تيم الشعب
الثوري الغالي



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




اشعار هاشم صديق

شكراً جزيلاً


شكراً جزيلاً

للخناجر ..للمغايس.

للمتاريس..للدسايس

للطريق

لامن يضيق.

للوَجَع

سوّى البِدَع

فَتّح مداَرس



شكراً جزيلاً

للأمل وسط السراب

لي حُراب

ناساً قراب

للعذاب

في كُلِّ باب.

للمَحكّات العجيبه

والمشاوير الغريبه.

لي تمن

عِشْق الوطن

جمرِ الضريبه.



شكراً جزيلاً

للعُصار.

للغُبار.

للبروق

الباقّه نار.

للاسى.

اللفّ الجزيره.

للأذى

الكتب الغنا

وضَوّ البصيره.



شكراً جزيلاً

لي سلاطين

الحساده.

للصعاليك

والسَياده.

للإبر

فوق الوِسَادَه.

للحُفر

في كُلْ ممر.

للركوب

وسط الخطر.

لي ملوك

فن النميمه.

للأباطيل اللئيمه

والأساطير

القديمه.

لي جَبُر

كسر العزيمه

والعبور

فوق الهزيمه


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




اشعار هاشم صديق



سحـــر الهــوى


أيا نفس الهوى

الممدود.

ويا طل السَحرَ

نقّط

على فرع الاسى

المشدود

ويا باب المنى

الفتَّح

على درب الهوى

المسدود.

نَقَعِ صوتِك

سَكن بيهو السلام

في الروح.

ليك بدّع

وتر قلبي

اتترنم نبض زمني.

وبيك قِدْرَت

جروحي تروح.

عليك تاوق

عليك تاوق

دَغَش موعود

وانعتق الفرح

رفرف

واتْهَدَّت سدود

وسدود

أيا حُضن الهوى

الأرْحب.

خليتي الشَمسِ

أقرَب.

كللتي الجُزُر بالغار

وعمَّدتي الحنين

بالنارِ.

ورَصّتي النجوم

أسرار

وجَّملتي البلد

أعذب.

ومديتي الأمل

والايد

سويتي العجب

أعجب.



وقع سور الأسى

الممدود

وانفتحت

حدود في حدود.



أيا نَفَس الفضا

الممدوِد.

ويا طَل السَحَر

نقَّط

على فرع الاسى

المشدود.

رجَّعتي الوجود

موجود

رجَّعتي الوجود

موجود.



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®






اشعار هاشم صديق

ميـــلاد


طالعه

من خاطْر البَحَر.

مغسوله

زي قمر السَهَر.

مرسومه

بي شَفق الزَهَر

طالعه

من زَبد البَحَر.

الموج على شَعْرِك

عَزَف.

الموج على نهديكْ

هَتَف.

الموج على ساقيكْ

وقَف.



طالعه

من قَلْب البَحَر

مكتوبه

بي قَدَر الصُدَف.

عينيكْ بَرَق

شوقِن لَصَف

رقص المُحار

ضحك الصَدَف.

طالعه

من حلم البَحَر

ايديكْ

محنَّنه بالشَفَق

ضحك مِشَعْشِع

بالألق.

تاجِك

مرصََّع بالصَفَق.



طالعه

من فَجْر البحر.

حُضنك

هَمَسْ شعْر الصباح.

خَتَّ النُقط

فوق الصَرَاح

ضوَّع عبير

ورد الجِراح.

أشَّر

على الزمن الشَرَق.

قابض

على جمر الورق.

خايض

على لهب الشَفقَ.

طالعه

من عُمق البَحَر

الموت يبوس

خدك يطول

يغمُر يباس

قفر الأفول.

قَصّر حضور

زمن الذهول

رجَّع نَفَس

نبض الفصول.

طالعه

من خَاطْر البَحَر

مغسوله

زي قمر السَهَر.

مرسومه

بي شَفق الزَّهَر


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





اشعار هاشم صديق

أتراح الحول الأول


الى روح والدتي العزيزة آمنه محمد الطاهر
(بت جنه)

من برد الليل

متغطي بتوبك

أتنفس وهَجَك

والقَلُب اتدفِّا.



أتذكَر سفرك

ونَفَس الكون

الجانا مَكفّن

ونام في محفّه.



أتذكَر شهقة

باب البيت

وجناح الصاقعه

الحوّم ورفَّ



أتذكر يُمه

صُراخ الليل

والدَمْع السيل

والبِرِش الفيكْ

ارتاح واتلفِّ



من سفرِك مرّ

الحول الاَول

والزمن الاسود

دوَّر ولفَّ

لا جرحك نام

لا صوتك صام

لا وجعِك خفَّ



يا محفوره

في قلب الخاطر

يامرسومه

في بطن الكفّه.

الزمن اتساقط

ورقو الأخضر

أصبح أصفر

العالم جفَّ.



استنيتك

متل العاشق

موج الشوق

في صدري جدوال

وقلبي تشقشق

فوق اغصانو

طيور الجنه

تومين في الشوق

يايمه انحنا

وبالحول استنا



مما فُتّي

-حفيف اقدامك-

حِلْم الشارع

ووتر الباب

لي نقءرك حنَّ

آه يايَمه

مما فُتي

الزمن اتغّير

الشعر اتحَّير

العالم صنّض.



يا مليانه

بشاشه ولون

يا حنيَّه

بحجم الكون.

يا الأديتي

خُطان عيون.

يا العلمتي القلم

اتحدَّى

يالساندانا

في وكت الشِدَّه.

يا الاحساسك

نوّضر وأدَّى.

يا أنفاس

الزمن العدَّ:

أحبك

موج الشوق

في سدري جدوال

وقلبي تشقشق

فوق أغصانو

طيور الجنه.

أحبك

وما في حبيبه أحنَّ

يا مفقوده

يا موجوده

يا "بت جنه"



من برد الليل

متغطي بتوبك

وحيد زي نَجمه

مدارها غيوم.

جبيني مولع

وعيني تدمِّع

معبور بالحُمى

أناجي النوم

العَبْرَه تخلّي

همومي مساهره

الوَحْدَة تفتّح

عين الذاكره.

أناغمك يُمه

تجيني مسافره

ألقاكِ محلّقه

فوق عيني.

ايديك مفرِوده

ونازله عَلَي.

بشويش كفيك

في جبيني اتْخَتّن.

العرق اتفصّد

الجسم اتعطّن.

فتحت عينَي

في عينيكْ اتملّن.



شابيت بالشوق

لي حُضنك أقوم

حسيت كفيكْ

في سدري تحوم.

تَبْتَبْتِي شقاي

هَدْهَدتي هموم

ومنِ برد الليل

كَرْفَسْتَ أساي

غبيّت في النوم.



من برد الليل

متغطي بت بتوبك

أتتنفس وهَجك

والقَلْب اتحسَّر

أتذَكَّر درسِك

حصص الرحله

فصول الدفتر.

يا مهمومه

بوجع الناسْ

يالاحساسك

واقد وحاسْ

يالرِبيتي

وغرسِك خضَّر.

يا مغبونه

بظُلم العسكر.

أتذكر نضمك

ونسة قلبك

سمحه وصافيه.

أتذكر يُمه

حلاوة اللُقمه

وسَمَر الصُحبه

وضحك العافية.

ياما قَسَمْنَا

غبينة الحُرقه.

يا ما عَبرنَا

مصايب الغُربه

يا ما صرخنا

في وش "المافيا"

يا ما عشقنا

الناس البُسطا

يا ما شَهَرنا

سيوف القافيه.



من بير الليل

صوتك رنَّ

والزمن ارتجَّ.

من توب الليل

نجمك حنَّ

تاوق وفجَّ.

في قلب ِ الليل

الدنيا تصِن

وحفيف قدميك

في الخاطر

دجَّ

يا رضيانه

وعافيه عَلَي.

يامفقوده

وماليه عيني.

العالم مات

والفرح اتفات

لكنك راكزه

وصوتك حي.



من برد الليل

متغطي بتوبك

اتنفَّس وهجك

والقَلُب اتدفِّا.



أتذكر سفرك

ونَفَس الكون

الجانا مكفَّن

ونام في محفّه

من سفرك

مرَّ الحول الاول

والزمن الاسود

دوَّر ولفَّ

ولا جرحك نام

لا صوتك صام

لا وجعك خفَّ

لا جرحك نام

لا صوتك صام

لا وجعك خفَّ


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




اشعار هاشم صديق

مسابقة رمضان


هنا امدرمان

مسابقة ...تسلية

فى رمضان

الحل ما ساهِل

فَكِّر..وقَدِّر يا انسان

جهِّز ورقة

وشغل عقلك

ورسل لينا الحل من فضلك

أسمع..وافهم

واكتب حَلَّك

...........

مُنَظِّر واهم

جاهِل ولا خِم

كتابتو حروف

من عَهْد الروم

كضاب لو تقرا وتَطْلَع فاهم

هو صحفى ...وزير

ومُحلل ..وكاتب

واكبر لُعَبى ..وعامل راهِب

مرة يِهَنّق..ومره يبرر

لما الوالى العادل يِشَنِّق

فى الجامعة فضايحو

كتاب منشور

عنوانو (غراميات دكتور)

مرات بتفلهم .. ويحلل (مايو)

ويرجع جذور (لعهد الفور).

ومرات يلخمنا بعهد الوفرة

كأنو الشعب الجايع تور

1975



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®







اشعار هاشم صديق

بريق الماس


عيونك...

سمرة العَسَل الموشَّح

بى بريق الماس.

ولما رموشك الحلوين

يَرُشَّن فوق تعبنا نِعاس

يِرِف همس الحلم فى الروح

بِجِنحين من صدى الاجراس.

ويسيل صوتِك

ترانيل زفّة للجنه

وكلام ولهان كِتِل جَنَّ

واقيف حيران أنادى الطيف

واخاف أسرح..أقوِم كيف

وانا المشدوه مع العَسَل

الموشَّح بى بريق الماس

منو البِقْدَر يشوف عينيك

ويفيق ويِرْجَع يحس بالناس

ولما عينيكى يا حلوتنا

تتِشَاقا

وتقول باكِر وفى الأحلام

حَنِتلاَقى

أنوم واصحا

وانوم تانى

عشان القاكِ يا سمحة

ويُمر الليل . وليل بكره

وما القاكْ

ويصير وعد العيون ذكرى.

واقابلِك فى الحقيقه قريب

واعاتبِك حول

وتتشاقى وتقولى نسيت

واعاين فيكِ زول مذهول

بَرِق شَعَّ وسَمَار مغزول

واقول يا ناس أنا المكتول

ولما أتوه مع السرحان

أقوّل..ياربى يا فنان

عيونها عُزاز...

طَرَب حَزنان فِرِح مره

حروف آيتين

تَسَبِّح بى قُدُرْةَ الله

يقين إنسان لِقَى التوبه.

نَقرة طار فى إيد مدَّاح

ونَشوَة غابِّى فى النوبه.

يا ريت فى عيونها إتحَكّر

أكان ترضى

أنوم واحلم مع المنظر.

أعيش راهب على المحراب

وأطل واضْفُر رموشه حجاب

عَشان أحميها من الناس

واعود تانى

أغازل سُمره العَسَل

الموشّح بى بريق الماس


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®






اشعار هاشم صديق

شفرة


العنوان...

ألف..لام..سين

واو... دال...أَلِف

وآخر الكلمة

حرف النون.

أخير الشَفْره

(أمن) السُلْطة ما مضمون

وياما السُلْطة

جو (البوسته)

ليها عيون

تَفْتَح..تقرا وتقفل تكتب

تلقى خطاك ..واداك

لسجون...

الاسم

أَلِف..لام..شين

عين..باء

قف.

ألف..لام ..واو

ألف عين يا.

قف

فجر الصَحْوَة يا مولانا

ولّع وجا

منو الماسم مصير البيت؟

شباب (الجبهة)

ولا اللعنة والخُلفََاَ؟

قف.

تَجَارْب الماضى زاد للجاىْ

أخير نوعى ونقول الراى

صلاح البيت

خطير ومصير

وما كلمات فى حفلة شاى.

قف.

يمين البيت طبخ لعبة

يسار البيت أمل(جبهة)

وشارع الحلة يا مولاى

كِتِل مرات

مِرِض مرات

جروحو جروح مظالم الليلة

غُلْب الفات

قف

(بديل مافيش)

نغم مرفوض

وكت تتوحد الرايات

قف

مدارْس الحلة بقَّت نار

وصاح صوت الشباب للتار

وانت الباقى يا مولاى

تعاين فىجنازْة الجار؟

بدون تصرخ

تقول التار

نقول التار

قف

الف..لام..يا

قاف...ظا

آخر الكلمة

مربوط تا.

يوليو1975م


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




اشعار هاشم صديق

وَصْف السّمحـــه


سواد ليلتين طُوال بالحيل

ضافيرِك ديل

وطرفك لما حام فوقى

غلبنى مع البِغَنّو الشيل.

وأمانه وكِت أشوف رقصِك

واشيل شبال

أبيت فى حال

تقول فارساً رَمَنُّو الخيل



أمِس فى بيتنا دقّ الباب

وزار حُسنِك طِرَى وطلَّ

وكِت سبق السلام خَطْوِك

رجَف قلبى وركع صلى

وبسيمتك لما غَنَّت لَىْ

وطاش صبرى وغِلِب قَلّ.

رفعت أيْدَى لخالقِك فوق

وقُت يا ناس أريد الله

وأحب الله



هى عيون شنو؟

دى المافى زول شافها وسِلِم

حتى الزمان عِشق الوَصِف

فيهن سَرَح غَلَبُو النَّضِم

زى سيف سَنِين عينيكى ديل

البدْنَا وين يرجع يِلِم

لو أقدَرِن يوم بالغُنا

يا دنيا داك يوم المُنَى

وبعد الوصف يحلا ويتم

إن كان أعيش وان كان أموت

يا سمحه أبداً ما بِهِم.




Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




اشعار هاشم صديق

همس الشوق


يا ريتنى لو أقدر أقول

فيكِ الكلام الما انْكتب

واجلى المقاطع بالدهب

وافرد صباح حُسنِك وشاح

يمسح عذاب عمرى المسطرّ باللهب



بريدك...

كلمه كان رفّت

يِهش ثغر النجوم ويسطعَ

ولما ينادى همس الشوق

يقيف كل الزمن ويسمع

عيونك ديل عيون أهلى

حُنان زى نغمة فى مقطع

وطُهرِك تاج جواهرهُ العزه

وانتى العزه ليك تركع

بحبِك يا صباح العيد

ويا فَرَح العريس السار

واحِسّك فى سما الأزمان

شمس بِتضَوى للمشوار

زمان يا حلوه ساقنى الليل

وغِبْتَ وضعتَ فى الأسفار

ولّما لقيت عيونك ديل

بديت اعشق عيون الدار



وَحَاة ريدى اللى شاف طيفِك

كتير قُباّل يلاقى ويشوف

جراح الماضى بيك نامت

وغابت كلُ رعشة خوف

بحبك ومافى غيرك نور

يهِل ويغمرُ طريق الشوف

وما فى بَلَاك نور بِسْطَع

ولا فرحاً يسوقنى يطوف


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®






اشعار هاشم صديق

حروف أسمك


حروف اسمِك

جمال الفال

وراحة البال

وهجعة زول بعد ترحال

وتنّية حلوة للشبال

ودنيتنا ومشاويرنا

وغنواتنا الى ما بتِنقال



حروف اسمِك

نجوم ركّت على الياسمين

فرح فى عين جمالها حزين

أساور فى إيدين طفلة

بتحفظ فى كتاب الدين

زَفَافَ عاشقين بعد فرقه

وسط باقات دُعَا الطيبين

حروف إسمِك

عقد منضوم بخيط النور

وطلة وردة من السور

ونغمة تنادى من طمبور

وشُعلة فرحة فى الوادى

تَشِع جَذلانه ليها شهور



حروف إسمِك

وَكِت أشتاق وأرحل ليك

وأسرح فى عسل عينيك

بِتَحضِنّىِ......

قَبُل ألمسَ حرير إيديك

تأرجِحنى..وتَفَرحنى..وتخلينى

أدُق سدرى

وأقيف وسط البلد واهتف

بريدك يا صَباح عمرى


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





اشعار هاشم صديق

إلى هتلر السودانى


شيل طبشيرة

وأكتب فى سبورتك عنى

خاين ..خاين..

قَطِّع جسمى ..وشَرِّح إسمى

ولم الناس للحفلة تعاين

ويوم ما تبدا ( الغش الشهرى)

إتمهّل ..وشَتّم

أصرخ ..تمتم

أَرْفِس ..أهْرِس

أسخر ونطط زى (بلياتشو)

وادهن وجهك

وحَلِّى المجلس

لكنك برضو..رغم الهيصة

أجهل عسكر ..وأغبى مِفَلِّس.


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





اشعار هاشم صديق

الفوارس والكوارث


ياتو ورقاً إتمضى
وكان دوانا من الأذى ؟!
ياتو ظلماً إتنسى
بس عشان مكاً ضحك
أوعشان سيداً عفا؟!
-----------
ياتو خطباً في إضينَا
جمّلت في عيونا شينة ؟
وياتو تلفاز
ياتو رادي
ياتو راوي
ياتو زينة
لبّست عريانّا توب
وبدلت طعم ( السخينة) ؟!
وياتو حلماً في عصورنا
ما صبح باللّت عجينة؟!
وياتو مركب في بحرنا
طاش صوابها
وهدهدت أعصابا مينا؟!
وياتو راجلاً بالبشارة
جانا من أقصا المدينة
و ب( البشاورة)
كان مسح سبورة الرحلة الحزينة
وكان غرس في الليل بشارات الرتينة
وشفانا من جوع أو حفا؟!
--------
ياتو مسرح إبتدا
وأسيادنا ماكانوا الفوارس
ونحنا كومبارس الحوادث؟!
وياتوا والي في المنابر
ما خطب فينا ونهر مليون شهر
ونحنا قاعدين في البنابر
قدامو زي شفع مدارس؟!
وياتو دستور ماصبح في راسنا قمبور
وياتو إعلان أو بيان
ما إنغرس في حلوقنا أحزان ؟!
وياتوا لحما للعضام يوما رجع
وياتو آذانيا عسس ( مالطة) انسمع ؟!
وياتوا صفا إنقسم وعاد يتمم وانجمع؟!
ويا رتبة وياتو قبة ما بقت في اللفة كُبة
وياتو صوتا من وجع دمدم هتف
ما انقطع حبلو ونزف
وبالأوامر والكوامر إتنفا ؟!
أحلام بتنقح طول دبابيس الليالي
ولما حمر الدنيا يصبح وما انجبر
يا دنيا خاتر لسه لافانا المواجع
والصفافير والمواتر
سيدا مرق ،
سيدا رجع ،
مكّاً دخل ،
مكاً طلع ،
شيخاً لبد ،
شيخاً نبل ،
سيفا ضحك ،
كشَّر كتل ،
ورقا جبل ،
ورقا سهل ،
صدقاً أفل ،
كضبا لمع ،
صنماً وقف ،
صنماً وقع،
كفاً عصر،
كفاً قلع ..
---------
والأماني
لسه في حال (الصواني)
لقمة طاعمة وبي كرامة
حبة إحساس بي السلامة
رجعة لي قيف الشهامة
مرقة من عصر القيامة
فرحة ما تكمل ندامة
لاها قصراً أو دواير
لاها بستان أو مناظر
لا ( مول) في ( وادي شنقول)
وكبري طاير في ( القماير)
لاها أموال في الخفا.
----------
أعفونا من كتر التحالف
والتخالف
والشراكة
والشياكة
والمواثيق
والتواثيق
والورق.
كم مرة أذنا الفجُر
قبال نفيق شفقو إنسرق
كم مرة بشّرتو الحشوم
أكلت عديل
مُر الصفقْ
كم مرة جربنا البيان
كم مرة جبناكم عيان
نشف البلد قلبو إنحرق
-------------
الشعب وين يا مؤمنين
ودستوروا في حلة إنسلق؟!
و ( القسمة) في ثروة منو
والشعب بي جوعو إنشرق
و(النسبة) في سلطة منو
و( سكرنا زاد)
( بالنسبة)
في الدم إنطلق
-----------------
إنتو الفوارس والمكوك
الداير يبيع تدوهوا ( في جاهكم يلوك)
واللسه ماسك في الجمر
يا ريتو بس يلقى النبق
والجوع يقطع في الحشا
ألفين سنة
----------
أدونا بس حق الصبر
خلونا من غش الكلام
وعد الرخا ، وليلة القدر
خلونا من كضب البشاير في القصايد والجرايد
أدونا بس حق الفطور
أعفونا من حق ( العوايد)
و( النفايات)
والدوا
وكفاية ( فك عكس الهوا)
-------------
يا مؤمنين الشعب وين؟
تاكلوا الثمر والشعب تدوهوا النوا ؟!
خلونا من حشد المواكب بي أجاويد الجرايد
والإذاعة
والإشاعة
وبي مناشير الوظيفة
كم مرة دقيتو النحاس
في لمبة طقت وطرشقت
أو ( ذرة) جاتكم حتى لو كانت خفيفة
أو ( نبلة) ناشت باب جنابكم
وعطسة قدت للرهيفة
أو هاجسة مرقت
من عقول عسس الخليفة.
----------
خلونا نمرق من هدومنا
ونغلي نهتف للكرامة
والشهامة
والحساب الفي الكتاب
وللرغيفة وللحليفة :
ما في جحرا تاني بلسع
ومافي عذرا للفوارس تاني بشفع
ومافي ومضا في عقولنا الصاحية نلقاهو إنطفا
وما في رجعات تاني للشوك والجفا
وورونا كيف ننسى الكوارث يا فوارس
الإنكسار
الإنشطار
الإنحسار
الذلة لي ناساً كرام
موت العروض
دك الفروض
بلع الحرام
وورونا كيف بس لينا يوم ( بعتوا الترام)؟!
ورونا كيف لمعت وشوش
كبرت كروش
وأنحنا ناس ربط الحزام
كَسر الخراب مرق البلد
حتى النفوس صبحت حطام
أدونا بس فرق العمر
سووا المعاش حبة لحم فوق العضام
أو ضحكة من جوه القلب
أو لمبة في جوف الضلام
ولو أصلو موت ، أدونا موت حق الكرام
-----------------
خلونا من جنس التخاريف في الثقافة
ومهرجانات السخافة
أدونا بس حبة ( كنافة)
ياتو حرفا يوم هتف بي غبنو أو صادم وقف
أشر علي حق ( إتلهف)
أو علي خطف الشرف
أو غنى للناس والشمس
وإتحدى للظلمة وعزف
وما اتخنق صوتو ونزف ؟
---------------
حرية وين يا مؤمنين؟
صوتنا وين يا موحدين ؟
الشعب وين في السلطة يا امة محمد ويا يسوع
القسمة في المال والحكم ولاّ المظالم والدموع ؟؟
يا شراكة
يا تحالف
يا تخالف
يا شياكة
يا قباب
يا رهاب
يا خطابة
يا شيوخ
يا شلوخ
يا مهابة
إنتو الفوارس في المسارح
ونحنا كومبارس الغلابة.
إنتو أبطال القصص
ونحن التلاميذ في الحصص
إنتو الأكابر في المنابر
ونحن حراس المقابر
بتصدقوا؟
أو تضحكوا ؟
قسماً عديل يا نبقى نحن السادة والحق والقيادة
وإنتوا خدامنا وزيادة
نطلع نكون نحن المنابر والإمامة
أوتقوم بينا القيامة .
الشعب ما ضحكة وقمامة
والصنّة ما بر السلامة
---------------
يا ناس كفاية من خراب
نبل الضماير والهواجس في البشاير
ومن طلاسم جاية باكر
ومن تعاويذ الولادة
ومن كضب يوم السماية
ومن تهاليل البداية
ومن عويل خط النهاية
ومن صراع كل الديوك للكراسي وللولاية.
-----------
يا ( مبيور) ويا ( جلابة)
أنحنا الشعب سدْرنَا ولَّع
وكركب تب
حتفاوضونا ؟؟
ولا نولِّع ونبدا حرابة
نخش الغابة ؟؟
ياتو ورقا إتمضا
وكان دوانا من الأذى
وياتو ظلما إتنسى
بس عشان مكاً ضحك
أو عشان سيداً عفا ؟!


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




اشعار هاشم صديق

قصة ثورة


لما الليل الظالم طوّل

وفجر النور من عينّا اتحول

قلنا نعيد الماضى الأول

ماضى جدودنا الهَزَمُوا الباغى

وهدّوا قلاع الظلم الطاغى.



وف ليله وكنا حُشود بِتصارع

عهد الظلم الشبَّ حواجز

شبَّ موانع

جانا هتاف من عِند الشارع

قسماً...قسماً

لن ننهار

طريق الثورة

هُدى الاحرار.

وغضب الامه اتمدد نار

والكل يا وطنى حشود ثوار

وهزمنا الليل

هزمنا الليل.

والنور فى الآخر طل الدار

والعزة اتهادت للأحرار.

وطنى أنحا سيوف امجادك

ونحنا مواكب تفدى تُرابك

ولِسّه الشارع بِشهَد لينا

فى يوم الغضبه حصاد ماضينا

مشينا نَعَطّر حقل الثوره

بِدَم نَفْدِيبُو بلادنا الحره

وكان اكتوبر فجر الغضبه

كسرنا قيود الماضى الصَعَبه

لما مشينا مواكب صَامده

تهدر- وتغلى ... وتهتف راعده:

الرصاص لن يفنينا.



وسال الدم فى أرض الوادى

فَدينا النور بالروح يا بلادى

وكانت صفحة حكاها العالم

وفجر اكتوبر طَلّ وسَالَم



كان فى الجامعه موكب هادر

صمَّم يجلى الليل السّادر

وكان الليل السادر غادر

فجّر غدرو سموم دخان

ورُصاص من صوته صِحَا السودان

والشعب الثائر

صمّم هادر

يصرع ليلنا الداجى الطَّوَّل

وكان القرشى شهيدنا الاول

وما اتراجَعنا

حلفنا نقاوم ليلنا وسِرنَا

نذرنا الروح ومَسَكْنَا دَرِبنَا

للشمس النايرة قطعنا بحور

حلفنا نموت أو نلقى النور

وكان فى الخطوه بنلقى شهيد

بى دمه بِيِرسُم فجر العيد.

يا اكتوبر

أنِحْنا العِشنا ليالى زمان

فى قيود ومظالم وويل وهوان

كان فى صدورنا غضب بركان

وكنا بنقسم بالاوطان

نَسَطَّر اسمك يا سودان

بدمانا السّالت راويه الساحه.

وحلفنا نسير ما نْضوق الراحه

شهرنا سيوف عِصيانّا المدنى

إيد فى ايد حلفنا نقاوم

ما بنِترْراَجع وما بِنءسَاوم

بينّا وبينك تار يا ظالم

خُطانا تسير فى درب النصر

هتافنا يدَوّى يهز القصر

كسرنا حواجز ..أزِلنا موانع

صفنا واحد

عامل.وطالب..زارع وصانع

وهزمنا الليل

هزمنا الليل

والنور فى الآخر طل الدار

والعِّزه اتهادت للأحرار

يا ساحة القصر..يا حقل

ويا واحهَ بتَحَضِن روح(نَصّار)

روينا ورودك دم ثوار

وشتَلنا فضاك هتاف أحرار

خَطّينا ترابك احرف نايره

بتحكى سطور ايامنا الثايره.

وشلنا الشهدا مشينا ونهتف

وجرح النار فى قلوبنا بينزف

سَجّينا الشُهدا وجينا نقاوم

ما بنِتراجع وما بِنساوم

وفجأه ونحنا صفوف بتصمم

زغرد فجر الثوره الحالم

والنور فى الآخر طل الدار

والعزه اتهادت للأحرار

قسماً..قسماً يا اكتوبر

نحمى شعارك

ونجنى ثمارك

ونرفع راية الثوره الغاليه

عاليه ترفرف فوق الساريه

عليها شعار الثوره الأكبر

رسُمه النادر زاهى واخضر

ولِسّه بنقسم يا اكتوبر

لما يطل فى فجرنا ظالم

نحمى شعار الثوره نقاوم

نبقى صفوف تمتدّ وتهتف

لما يعود الفجر الحالم


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®






اشعار هاشم صديق

كِمل العَسَل

كمَلتَ فيكْ أحلى الكلام
فى خيط صِلَتْنَا نضمتو ليك.
سافرت حتى المستحيل
كان تعبى يوم ما يهون عليك
ووقفتَ فى وش الرياح
شان تهد ا ما تغدر عِنيك.
وما لقيت معاك غير الجفا
وسهراً صعيب
ماخَفَّفَت من تعبو يوم نسمة صَفا.
لكنى رغم الزاد على
ورغم المقطّع فى الحَشَا
ما ببكى ليكى
حايفيد شنو ويدّى البُكا.
عارف تمام...
كِمل العَسَل
والشوق رَحَل.
لمس اليباس حتى السلام.
ماتت حُروف كل الكلامز
واصبحتَ يا نجمى الزمان
من دون نَجمِ طاوى الزمان.
سوَّاح مشى الليل الفسيح
يا ريتنى بس انسى الحصل
أو يوم أنوم لحظة استريح.
ويا ريت تسيب قُولَة سَمَاح
حبل السّمَاح مديتو ليك مثل المسيح
وما لقيت معاك غير الجفا
وسهراً صعيب
ما خَفَّفَت من تَعَبو يوم نسمة صفا.
لكنى رغم الزاد على
ورغم المقَطّع فى الحَشَا
ما ببكى ليك
حايفيد شنو ويدّى البُكا_
يا حليل زمان
شدِّيت جواد الرّيده
فى السفر الطويل.
ريدِك عيون تَسْبِق خُطاى
ونجوم تَشِع تهدى السبيل
وعشان أجيب ليك المراد
دقيت جدار المستحيل
ورجعتَ ليك طاوى الوهاد
الليل يفوت ويْعَقْبُو ليل.
ما قلت ليك كيفن شقيت
ولا يوم شكيت تعب الرحيل.
لكنى آه يا دنيا من قِلَّ الوفا
لا من لقيت طيفك معاى
ما لقيت معاك غير الجّفا
وسهراَ صَعِيْب
ما خَفّفَت من تعبو يوم نسمة صفا.
لكنى رغم الزاد علَى
ورغم المقَطَّع فى الحشا
ماببكى ليك
حايفيد شنو ويدِّى البُكا.


Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®





اشعار هاشم صديق

ســألت عــليك

سألت عليكِ
لا خليت رمُل
في القيف
لا خليت صَدَف
في القاع.
بَحَتّ القَمَره
بي ايدَّيا
ما خليت حُجار
وشُعاع.
وَصَفْتَ صِباكِ
"للتلفاز"
رسمت هواكِ
"للمذياع"
جَدَعني الشوق
لثحضْن الريح
ولفّيت
أسأل الاصقاع.
فَتَرتَ
وما فتر حلمي
ما صدَّق
حضورِك ضاع.
سألت عليكِ
لا خليت
صدُر مغبون.
لا خليت
خيوط في لون.
لا خليت
وهَج في عيون.
لا خليت
نَجِم مسكون.
سألت عليكِ
لا خليت
حُضُنْ مهجور.
لا خليت
غُبار عتمور.
لا خليت
فرح محْزُون.
لا خليت
غضب مجنون.
سألت عليكِ
لا خليت
بحر وشراع.
لا خليت
صَدَف في القاع.
جدعني الموج
لُحضْن الريح
ولفّيت
أسال الاصقاع
فَتَرتَ
وما فَتَر حلمي
وما صدَّق
حضورك ضاع.
ويدفر فيني
ليل في ليل
ويشِق
بي وهجو
مليون ميل.
يقول لي قدمي
شِدِّي الحيل.
أخير نحلم
أخير نسأل
بدل يصبح
فَتَرْنا سكوّت.
سألت عليكِ
لا خليت
صدُر مغبون.
لا خليت
وهَج في عيون.
لا خليت
هُتاف مسجون.
لا خليت
غضب مجنون.
يا معطونه
في روحي
تكوني أكون
يا معطونه
في روحنا
تكوني نكون
تكوني نكون

Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




اشعار هاشم صديق

ودعتين

ودعتين
من مِفْرَق الشَعَر
الاصيل
زانت جبينِك
وتاوقَن.
ودعتين شَدَهُو
الجبين
ولاّ الجبين
شَدَه الوَدِع
نامن عليهو
وسَلّمن.
يا بنيَّه صحيتي
الشِعِر
فيكِ العيون
إتسَمَّرَن.
رجّعتي حال
وهجا هَمد
بيكِ البروق
اتلاصَفن.
ودقيتي باب
زمناً نعس
عَزَفَن صوابْعك
نقّرن
شَهَق الغَرب
فُرقان جبالو
اتمحّنَنْ
اتقسّم "المردوم"
لَهَج
بي اسمك المنضوم
رطن
هزَّ الطرب
شِدَر الوِدَي
كل الغضون اتْجَنَنَنْ.
ودعتين
عِشْقُو الجبين
بي خيط بهاهو
اتعلّقَن.
خَتّن رَحَل
شوقِن عليهو
اتمسَّحن واتبرَّكن.
طلّن على العينين
سِهَن فيهن
زمن واتمحنن.
ولا مِن شَرَق
ثَغْر الوجيه
بي بسمه
وابتهج الزمن
شهقن عديل
من دفقة الالق
الاصيل
واتقالدن واتمرجَحَن.
يا بنيه مَسَّختي
البنادر
الله قادِر
خَتَّ فيك
عَبَق الوطن.



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®




اشعار هاشم صديق

وِكتين تَجِى

وكِتين تجى
يَرقُص ويميل بابنا الكبير تحت الشمس
النِيّم يَفُوح يِصبِح وَرِد
والبيت يِنُور جيرو ويهش
تُمتُم خُطاك شَدَه العَتَب
وسوى العَجَب
خَلّى الجريد فوق السَّقِف
خَدّر وطال كَسّا العرش
وخلّى النّجم لينا أنبرش
وحَرَن القمر
اقسم يمين ما يغيب ويِمِ
وكتيت تجى
القاكى دَارِع فوقى شال
مشغول بجدلت الحرير
والعِمّه كيف
والمكوه سيف
وقليبى ليك عند السلام
القاهو بس داير يطير
واكرم مَجِيك
أسقِيك قصايدى الفيك عصير
واجلِد دلاليك الفرح
من الصباح لاَ عِن نسيمات العصير
وكتين تجى
شُبَاكنا يفرد ضلفتين
وحبوبه لى خالق الجمال
تتوضا تركع ركعتين
ودنيتنا تصبح دنيتين
وصغارنا ليك طابور شَرَف
تعظيم سلام ويمين شمال..وشمال يمين
والعيد يصل قبُل الميعاد
والخير يزيد......ويملا الايدين..



Copyright ©2010 - 2011 zankalooni.hooxs.com
جميع الحقوق محفوظة لمنتديات زنكلوني®


الرجوع الى أعلى الصفحة اذهب الى الأسفل
https://zankalooni.hooxs.com
 
هاشم صديق
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
zankalooni :: منتدى الشعر السوداني-
انتقل الى: